Ethnotronica Almaty elektrondy mýzyka festıvali Abaı alańynda 10 qyrkúıekte saǵat 19.00-de ótedi. Mýzykalyq sharany The Spirit of Tengri halyqaralyq mýltımádenı jobasy usynady, dep habarlaıdy Almaty-akshamy.kz.
Sahnada álemge áıgili etnomýzykanttar Qazaqstannyń elektrondy mýzykanttarymen birlesip óner kórsetedi. Úsh saǵattyq shoýdyń baǵdarlamasy Vengrıa, Grýzıa, Ózbekstan, Tyva, Taýly Shorıanyń jáne Qazaqstannyń tanymal ujymdarynyń, solıseri men dance-toptarynyń ókilderinen turady: Zsombor Feher (Vengrıa), Simi (Grýzıa), ABBOS (Ózbekstan), Radik Tyulyush (Tyva), Chyltys (Taýly Shorıa) jáne Steppe Sons (Qazaqstan), otandyq elektrondyq mýzyka ókilderi: AlmaLogic project (Narıman Isenov jáne Mırhat Kataýov), DJ Kokonja, DJ Ruus jáne Edige, jeke oryndaýshylar - Layla-Qobyz, Nuketai, Aıjan Bekturǵan, bı ujymdary - ARTballet (Ýkraına/Qazaqstan), TUMOR dance group (Ózbekstan), Gzeba Georgian Dance (Grýzıa).
«Túrli ulttyq mádenıetterdiń, mýzykalyq-tarıhı dáýirlerdiń, óner túrleri men mýzykanttar úndestiginiń kollaborasıasy erekshe jiger berip, shyǵarmashylyq shabytqa bóleıdi. Táýelsizdik jyldary ómirge kelgen ári eseıgen, mýzykaǵa degen ózindik kózqarastary bar elektrondy mýzykanttardyń jas býyny alǵash ret úlken sahnaǵa shyǵady. Barlyq baǵdarlama festıvál úshin arnaıy ázirlenedi, - dep atap ótti festıváldy uıymdastyrýshylar.
Shoý naqty ýaqyt rejıminde keń formatty LED-dıspleıler arqyly tutas vızýaldy performans arqyly usynylady. Sondaı-aq festıvál Tengri TV jáne The Spirit of Tengri-diń resmı YouTube arnalarynda onlaın kórsetiledi.
Eske salsaq, The Spirit of Tengri halyqaralyq mýltımádenı jobasyn 2012 jyly Tengri FM qazaqstandyq ulttyq radıostansıa qurǵan bolatyn. Maqsaty-qazaqstandyqtar men elimizdiń qonaqtaryn Uly dala jáne búkil álem halyqtarynyń murasymen tanystyrý. Joba ulttyq aýqymdaǵy mádenı brend mártebesine ıe. Festıvál barysynda 80-nen astam elden kelgen júzdegen tanymal mýzykanttar men ujymdar óner kórsetedi. Al onyń qonaqtary men kórermenderi – 120 myńnan astam adam.