Tegin úıretiledi
Almatyda elektrli samokatty tebýdi úıretetin mektep ashyldy. Munda kámelet jasyna tolǵan barlyq azamatqa samokatty qala jaǵdaıynda qaýipsiz jáne durys paıdalaný tegin úıretiledi, dep habarlaıdy Almaty-akshamy.kz QazAqparat-qa silteme jasap.
Elektrli samokattardy jalǵa berý qyzmetin usynatyn kompanıanyń syrtqy baılanystar bóliminiń basshysy Danııl Kapsanyń aıtýynsha, qala turǵyndary samokattardy durys júrgizýdi jáne turaqqa qoıýdy úırenedi. Sondaı-aq jeke qozǵalys qurylǵysyn paıdalaný erejelerimen tanysady.
«Búgingi kúni álemde elektrli samokat – jańa kólik túri bolyp sanalady. Ol barlyq iri megapolısterde bar. Adamdar bul kólikke úırenip, ony qoldana da bilýi qajet. Avtomektep – qarapaıym, biraq óte mańyzdy qaýipsizdik erejelerin úıretedi. Biz bul mektepte jol júrý erejesin kez kelgen adamǵa túsindiremiz», - deıdi Danııl Kapsan.
Elektrli samokattardy jalǵa berý qyzmetin usynatyn kompanıalar oqytýdy apta saıyn qalanyń ár bóliginde uıymdastyratyn bolady. Atalǵan sharalar ákimdik pen komanıalar arasynda jasalǵan memorandým aıasynda júzege asyrylady.
Oqytý qorytyndysy boıynsha qoldanýshylar test tapsyryp, tegin mınýttar alýǵa jáne jyldamdyqty 25 km/saǵ jetkizýge múmkindik beretin promo-kod ala alady. Jol qozǵalysyna qatysýshylardyń qaýipsizdigin qamtamasyz etý maqsatynda oqytýdan ótpegen qoldanýshylar úshin maksımaldy jyldamdyq 20 km/saǵ deıin shekteledi.
Danııl Kapsan ózi ókildik etetin kompanıa halyqaralyq ekenin aıtty. Ol álemniń 45 qalasynda jumys isteıdi.
«Bizdiń kompanıa qyzmet kórsetetin barlyq qalada qatelikter qaıtalanady. Olardyń kópshiligi, ókinishke oraı, qaıǵyly jaǵdaıǵa ákelip jatady. Birinshi ereje – samokatqa eki adamǵa minýge bolmaıdy. Ol velosıped sıaqty, belgili bir salmaqqa arnalǵan. Ekinshi jıi kezdesetin qatelik – paıdalanýshynyń samokatpen joldy kesip ótýi. Joldy jaıaý kesip ótý kerek. Jaıaý júrginshiler ótkelinde samokattan túsken abzal. Bul paıdalanýshynyń ómiri men densaýlyǵy úshin óte mańyzdy», - dedi ol.
Sondaı-aq Danııl Kapsan elektrli samokat mektebi maýsymnyń sońyna deıin – kún sýytqanǵa deıin jumys isteıtinin aıtty. Almatyda – jeltoqsan, elordada – qarasha aıyna deıin.