8 qoqys orny tazartylǵan
Qaladaǵy qoqys polıgondarynyń qatary azaıǵanymen, máseleniń aýqymy áli de keń. Mamandar japan dala, jol boıyndaǵy úıindilerdiń jaıyna alańdaıdy, dep habarlaıdy Almaty-akshamy.kz Almaty.tv-ge silteme jasap.
Almaty aýmaǵynda ruqsat etilmegen 13 qoqys orny anyqtalypty. Olardyń árqaısysy ǵarysh sapary boıynsha tirkelgen. Qazirgi tańda 8 qoqys orny tazartylǵan.
Kúni keshe Almaty – Atyraý baǵytyndaǵy ushaqtyń qozǵaltqyshyna qustar kirip ketken edi. Saldarynan kelesi reıs keshiktirildi. Bul jaǵdaı birinshi ret emes. Al qaldyqty qorek qylǵan quzǵyn-qarǵanyń jaqyn mańdaǵy úıindiden keletini de anyq. Ekologtardyń aıtýynsha, aınalany qoqysqa aınaldyrǵan da adamnyń ózi.
«Jaqyn mańda eshqandaı turǵyn úı joq. Ózimizdiń halyq tógip ketip jatady. Kóbine túngi ýaqytta, úlken júk mashınalarymen kelip qoqys tógedi. Osyndaı jabaıy qoqys, qaldyqtar orny solaı paıda bolyp jatady. Endi onymen qoldan kelgenshe kúresip jatyrmyz», – dedi Túrksib aýdany ekologıa jáne qorshaǵan ortany qorǵaý bóliminiń basshysy Nurdan Dúısekeev.
Arnaıy tehnıka da jumyldyrylǵan. Mundaı oryndardy anyqtaý spýtnıktik jeliniń kómegimen iske asatynyn aıta ketken jón. Al tutynýǵa keletin qaldyqtardy zalalsyzdandyrý, ony kádege jaratý – negizgi shara.
«Aýa transport prokýratýrasy bizge hattamany jibergen bolatyn. Sol boıynsha biz monıtorıńke shyǵyp, jabaıy qoqysty taptyq. Osy jerde Túrksib aýdany apparatymen birlesip, tazartý jumystaryn júrgizip jatyrmyz», – dedi qalalyq ekologıa departamentiniń mamany Ádil Nurpeıisov.
Ekologtardyń aıtýynsha, maman jumysyn istegenimen, adam óz áreketin baqylaýǵa alýy kerek. Sonda ǵana úıindi azaıyp, qaldyq kádege jaraıdy.