Megapolıs respýblıka óńirleri arasynda jetekshi orynǵa ıe.
Bul týraly Óńirlik komýnıkasıalar qyzmetiniń esep berý brıfıńinde Almaty qalasy ákiminiń orynbasary Álisher Ábdiqadyrov aıtty,dep habarlaıdy Almaty-akshamy.kz.
Megapolıs respýblıka óńirleri arasynda jetekshi orynǵa ıe, aǵymdaǵy jyldyń 11 aıynyń qorytyndysy boıynsha, qysqa merzimdi ekonomıkalyq kórsetkish 6,2%-ǵa deıin ósti.
Álisher Ábdiqadyrovtyń aıtýynsha, ósimniń draıveri ósý qarqyny boıynsha elimizde birinshi orynda turǵan óńdeýshi ónerkásip boldy. Qala ekonomıkasynyń iri salasy – saýda, eń aldymen, kóterme saýdanyń 6,0%-ǵa ósýi esebinen 5,6%-ǵa deıin ósti.
«Ekonomıkany qalpyna keltirýdiń joǵary qarqyny salyq túsimderiniń ósýin qamtamasyz etti. Salyq túsimderi 42,1%-ǵa ósip, 3 581,2 mlrd teńgeni qurady, onyń ishinde SHOB sýbektilerinen – 49%-ǵa», – dedi Almaty qalasy ákiminiń orynbasary.
Investısıalyq belsendiliktiń joǵary deńgeıin jeke ınvestısıalardyń 16%-ǵa ósýinen bolǵanyn atap ótken jón. Bul rette birinshi jartyjyldyqta tikeleı sheteldik ınvestısıa 32 paıyzǵa ósip, 2,3 mıllıard dollardy qurady.
ÓKQ spıkeri jyl basynan beri 1,2 trln teńgeden astam ınvestısıa tartylǵanyn naqtylady. Jalpy, 2022 jyldyń qorytyndysy boıynsha Almaty ekonomıkasy 5,0%-ǵa deıin ósedi dep kútilýde.