Qarashanyń 4 men 5 kúnderi ońtústik astanada Halyqaralyq Almaty Food Fest gastronomıalyq festıvali ótedi.
Dástúr boıynsha, Abaı atyndaǵy alań birneshe taqyryptyq aýmaqqa bólinip, onda kez-kelgen adam álem asqanalarynyń túrli taǵamdarynan dám tata alady. Sharaǵa 10 myńnan astam adam keledi dep josparlanyp otyr. İs-sharany uıymdastyrýshy – Almaty qalasynyń Týrızm basqarmasy.
Týrısik baǵyttardy tańdaý kezinde saıahatshylardyń taǵamdarǵa qatysty talǵamy mańyzdy ról atqaratyny belgili. Búgingi tańda týrıserdiń kóbi jergilikti mádenıetpen tereńirek tanysýdy qalaıdy. Ulttyq taǵamdar - tól mádenıettiń bir bólshegi. Sondyqtan gastronomıalyq týrızm damyp, búkil álem boıynsha tanymal trendke aınalyp keledi. Sheteldik qonaqtarǵa belgili bir eldiń tarıhyn, salt-dástúri men mádenıetin jaqsyraq túsinýge múmkindik beretin gastronomıalyq festıválderdiń aspazdyq týrızm sektoryndaǵy mańyzy zor.
«Almaty Food Fest – Almatynyń týrıser men naǵyz talǵampaz gýrmandardy tartatynyna aıqyn dálel bola alady. Bul is-shara ulttyq mádenıet pen asqanamyzdyń baılyǵyn kórsetip, qonaqtarǵa jergilikti salt-dástúrler men mádenı erekshelikterdi aıshyqtaı túsetin atmosferany seziný múmkindigin usynady. Sondaı-aq, festıvál sheteldik, ári jergilikti saıahatshylardy tarta otyryp, qalamyzdyń gastronomıalyq týrızmniń negizgi baǵyty retindegi áleýetin arttyrýǵa septigin tıgizedi», - deıdi Ǵalıa Toqseıitova, Almaty qalasy Týrızm basqarmasynyń jetekshisi.
Almaty Food Fest eki kún qatarynan ótedi. Shara ótetin oryn retinde Abaı atyndaǵy alań (Respýblıka saraıynyń aldynda) tańdalǵan, ol birneshe aspazdyq aýmaqqa bólinedi. Munda álemniń túrli ulttyq asqanalary usynylady, onyń ishinde azıalyq, amerıkalyq, grýzın, meksıkalyq jáne qazaqtyń ulttyq taǵamdary da bar. Jalpy alǵanda, Almatynyń 40-tan astam tanymal tamaqtaný orny, oǵan qosa, qolónershiler men fermerler óz ónimderin ortaǵa salmaq.
«Gastronomıalyq festıválder meıramhanalar men jergilikti taǵam ónimderin óndirýshilerge básekelesterinen ózgeshelenip, kózge túsýge kómektesedi. Taǵamdar – eldiń ózine ǵana tán bolmysyn pash etetin erekshe aspekt. Sondyqtan mundaı aýqymdy gastronomıalyq sharalardyń ótýi jergilikti ekonomıkany qoldaýǵa, turaqty týrızmdi nasıhattaýǵa, sonymen qatar, mádenı jáne ulttyq murany tereńirek túsinýge eleýli úles qosady», - dep pikir bildirdi Aleksandr Proshenkov, bas aspaz.
Qonaqtarǵa gastronomıalyq oıyn-saýyq sharalary da usynylmaq, festıvál aıasynda aspazdyq shoýlary men álemdik deńgeıdegi bas aspazdardyń sheberlik dáristeri, barmender men barıstalar saıysy, fermerlik ónimder men sheberlerdiń qolynan shyqqan buıymdar satylatyn jármeńke uıymdastyrylady. Almaty Food Fest 2023 sharasynyń sheteldik qatysýshylary qatarynda Ulybrıtanıa, BAÁ, Katar men basqa da elderdiń fýd-blogerleri bar. Olar festıvál kezinde usynylǵan ulttyq aspazdyq týyndylarǵa beıne-sholý jasaıdy. Almaty Food Fest sharasyna keletin qonaqtardyń sany 10 myń adamnan asady dep kózdelip otyr.