Búgin Almatyda áıgili qazaqstandyq sportshy, qysqy Olımpıadanyń qola júldegeri Denıs Tenniń jarqyn beınesine arnalǵan mánerlep syrǵanaýdan VI-shy halyqaralyq «Denis Ten Memorial Challenge» týrnıri saltanatty túrde ashyldy. «Halyq Arena» muz aıdynynda sport federasıalarynyń ókilderi, resmı tulǵalar, qurmetti qonaqtar men mánerlep syrǵanaý jankúıerleri bas qosty.
Saltanatty is-sharada «Qazaqstandyq mánerlep syrǵanaý odaǵy» federasıasynyń prezıdenti Baýyrjan Eraly jáne Qazaqstan Ulttyq Olımpıada komıteti Bas hatshylyǵynyń hatshysy Álimjan Aqaev quttyqtaý sóz sóılep, týrnırdiń el sporty úshin mańyzy men jas daryndardy qoldaýdaǵy rólin atap ótti.
Tórt kúnge sozylatyn jarysqa 18 elden kelgen 130-dan astam sportshy qatysady. Muz aıdynynda Qazaqstannyń úzdik mánerlep syrǵanaýshylary da, álemdik juldyzdar da óner kórsetpek. Olardyń qatarynda amerıkalyq áıgili sportshy Djeıson Braýn men Ońtústik Koreıa chempıony Cha Djýnhvan bar.Kórermen nazary – almatylyq mánerlep syrǵanaýshy Mıhaıl Shaıdorovqa aýdy. Ol 2025 jylǵy Tórt qurlyq chempıonatynyń jeńimpazy, álem chempıonatynyń kúmis júldegeri, sondaı-aq Grand Prix jáne Challenger Series dodalarynyń birneshe dúrkin jeńimpazy. Mıhaıl Shaıdorov qazaqstandyq erler mánerlep syrǵanaýynyń kóshbasshysy sanalady. Onyń týrnırge qatysýy elimizdiń mánerlep syrǵanaý mektebiniń sabaqtastyǵy men joǵary deńgeıin aıqyndaıdy.
Jarys sońynda eń úzdik sportshylar qatysatyn keshki gala-shoý ótedi. Kórermenderdi áserli qoıylymdar, tosynsyılar men merekelik kóńil-kúı kútip tur. Bul sporttyq mereke Almaty turǵyndary men qonaqtarynyń esinde uzaq saqtalary sózsiz.