Almatyda qala ákiminiń orynbasary Almasqan Smatlaevtyń tóraǵalyǵymen tótenshe jaǵdaılardyń aldyn alý jáne joıý jónindegi komısıanyń otyrysy ótti.
Jıynda halyqtyń qaýipsizdigin qamtamasyz etý jáne kúzgi-qysqy maýsymda qalanyń turaqty jumysyn saqtaý máselelerine erekshe nazar aýdaryldy.
Almasqan Smatlaev ózgermeli klımat jaǵdaıynda qaýip-qaterdi ýaqytyly anyqtap, ony azaıtýdyń mańyzdylyǵyn atap ótip, azamattyq qorǵaý qyzmetteri men memlekettik organdardyń ózara is-qımylynyń aıqyn bolýy qajettigin jetkizdi.
Almaty qalasy TJD bastyǵynyń ýaqytsha mindetin atqarýshy Damır Ermaǵambetov qysqy kezeńge daıyndyq, sý tasqyny men kóshkin qaýpiniń aldyn alý sharalary, shomylý maýsymynyń qorytyndylary, órt qaýipsizdigi, jalpyqalalyq seısmıkalyq daıyndyq, sondaı-aq ýly zattar saqtalatyn nysandardaǵy qaýipsizdik máselesi týraly baıandady.
Otyrys sońynda memlekettik organdarǵa qala turǵyndaryn tabıǵı jáne tehnogendik sıpattaǵy tótenshe jaǵdaılardan qorǵaý sharalaryn kúsheıtý jóninde naqty tapsyrma berildi.