Pavlodarda qoǵamdyq kólikte jol júrý aqysyn 200 teńgege deıin kóterýdi josparlap otyr, dep habarlaıdy almaty-akshamy.kz Zakon.kz. silteme jasap.
Pavlodar ákimdiginiń qaýlysynyń jobasy "Ashyq NQA" saıtynda jarıalanǵan.
"Pavlodar aýmaǵynda qalalyq qatynastarda jolaýshylar men bagajdy turaqty avtomobıldi tasymaldaýǵa saralanǵan tarıf kelesi mólsherde belgilensin: elektrondy tólem júıesi arqyly, Internet jelisi jáne uıaly baılanys qurylǵysy arqyly – 100 (júz) teńge, qolma-qol tólem kezinde – 200 (eki júz) teńge", - delingen qaýly jobasynda.
Engiziletin ózgeristiń negizdemesi retinde "Pavlodar oblystyq kólik jáne tasymaldaýshylar odaǵy" qaýymdastyǵynyń otyn, qosalqy bólshekter, elektr energıasy qunynyń ulǵaıýyna baılanysty jol júrý tarıfin kóterý týraly ótinishi kórsetilgen.
Osy qaýly alǵashqy resmı jarıalanǵan kúnnen 10 kún ótken soń qoldanysqa engiziledi.
Buǵan deıin pavlodarlyq qoǵamdyq kólikte jol júrý quny qolma-qol aqshasyz tólem úshin 80 teńge, qolma-qol 130 teńge bolǵan.