Almatynyń 2025 jylǵa arnalǵan búdjeti 2022 jyldyń basyndaǵy búdjetinen 2 ese kóp
2023 jyly Almaty ekonomıkasynyń rekordtyq ósimi jáne joǵary baza qalyptasýy aıasynda qala ekonomıkasynyń qarqyndy damýy jalǵasýda. Bul týraly Almaty ákimi Erbolat Dosaev 2025-2027 jyldarǵa arnalǵan búdjet bekitilgen máslıhattyń kezekten tys sesıasynda málimdedi, dep habarlaıdy aqshamnews.kz
«2024 jyldyń 10 aıynda Almatynyń qysqa merzimdi ekonomıkalyq ındıkatory 5,2%-ǵa deıin jedeldedi. Bul iskerlik jáne ınvestısıalyq belsendiliktiń joǵary deńgeıimen birge júredi. Negizgi kapıtalǵa salynǵan ınvestısıa 8,2%-ǵa ósip, 1,3 trln teńgege jetti. Bıylǵy jyldyń birinshi jartyjyldyǵynda 3,8 mlrd AQSH dollary kóleminde tikeleı sheteldik ınvestısıa tartyldy», – dedi qala basshysy.
Ákimniń aıtýynsha, Almaty ekonomıkasynyń qarqyndy damýy qala kiristeriniń ósýine múmkindik berdi. 2024 jyldyń 11 aıynda Almaty búdjetine 1 650 mlrd teńge aýdaryldy, bul ótken jylmen salystyrǵanda 25,8%-ǵa artyq.
«Bizdiń boljamǵa sáıkes, 2024 jyly Almaty ekonomıkasynyń ósimi 5,5% deńgeıinde bolady dep kútilýde. Al 2025 jyly bul kórsetkish 6,4%-ǵa deıin jedeldemek», – dedi Almaty ákimi.
Ekonomıkanyń turaqty ósýi aıasynda jergilikti búdjettiń kiristeri de artyp keledi. Búginde búdjettiń 95%-y qalanyń óz kiristerinen qalyptasýda.
«2025 jylǵa arnalǵan Almaty búdjeti 2 trln 177 mlrd teńge kóleminde josparlanyp otyr. Bul 2022 jyldyń basyndaǵy 1 trln 70 mlrd teńgeden 2 ese kóp», – dep sózin qorytyndylady Erbolat Dosaev.
Aıta keteıik, Almaty búdjeti áleýmettik baǵytyn saqtap keledi. Áleýmettik salaǵa jumsalatyn shyǵyndar 15%-ǵa nemese 110,6 mlrd teńgege ulǵaıyp, 851,9 mlrd teńgege jetti, bul búdjet shyǵystarynyń shamamen 40%-y.