İs-sharaǵa 50 den astam volonterler keldi
Megapolıstiń “Jeltoqsan” saıabaǵynda Respýblıka kúnine oraı merekelik is-shara uıymdastyryldy. "Jeltoqsan" QB jáne Almaty qalasy boıynsha «Assambleıa jastary» RQB ókilderiniń qatysýymen aǵash otyrǵyzý, sondaı-aq saıabaqtyń irgeles aýmaǵyn abattandyrý jáne sanıtarlyq tazartý jumystary júrgizildi, dep habarlaıdy Almaty-akshamy.kz.
“Merekelik kúntizbemizge engen Respýblıka kúnin toılaý bastalyp ketti. Búgingi sharaǵa jeltoqsanshylar men jastar birigip atsalysyp jatyr. 1000-nan astam aǵash otyrǵyzdyq. Sporttyń birneshe túrinen jarystar ótkizilip, bárimiz máz meıram bolyp jatqan jaıymyz bar. Elimizdiń mereıi asqaqtap, egemendigimiz arta bersin degen tilek bildiremiz”, - deıdi Almaty qalalyq “Jeltoqsan qoǵamy” uıymynyń tóraǵasy Nurlybek Qýanbaev.
İs-shara qonaqtary úshin konserttik baǵdarlama, altyn saqa, tumaq atý, arqan tartý sekildi ulttyq sport túrinen jarystar jáne merekelik dastarhan usynyldy.
“İs-sharaǵa 50 den astam volonterler keldi. Budan bólek stýdentter, «Assambleıa jastary» óz úlesterin qosýda. Jastar bolyp úlken býyn ókilderiniń áńgimelerin, ónegelerin estip, aǵash otyrǵyzý arqyly ıgi sharany qolǵa alýdy jón sanadyq. Aǵalarymyzdan “Jeltoqsan” oqıǵasy kezindegi sátterdi surap tanym kókjıegimizdi arttyryp jatyrmyz. Sondaı-aq, tabıǵat aıasynda demalyp, sýretke de túsý múmkindigine ıe boldyq”, - deıdi Qazaqstan eriktiler qoǵamdyq qorynyń joba menedjeri Nurjan Mádı.
Osy rette, qalada otyrǵyzylatyn aǵash túrleri ǵylymı qaýymdastyq pen landshaft sarapshylarynyń qatysýymen, klımattyq jáne topyraq erekshelikterine qaraı tańdap alynatynyn aıta ketkenimiz jón.
Atap óterligi, búginde aýqymdy kógaldandyrý jumystarynyń qarqyndy júrgizilýimen qatar, jalpy kógaldandyrý saıasaty da túbegeıli ózgerdi. Basty nazar baqylaýsyz aǵash otyrǵyzýlardan jasyl qordy emdeý men bıoárkelkilikti saqtaýǵa qaraı aýysty. Jasyl jelekti sýarý jumystaryn kúsheıtý úshin jańa sý uńǵymalary salynyp, aryq júıesi túgendeldi.