Ekonomıkanyń túrli salasynda birqatar joba iske asyrý satysynda tur
Qazaqstan men Túrikmenstan arasyndaǵy ózara saýda 2 esege ósti. Bul týraly búgin Aqordada Túrikmenstan Prezıdenti Serdar Berdimuhamedovpen kelissózderden keıingi BAQ ókilderine arnalǵan brıfıńide Memleket basshysy Qasym-Jomart Toqaev aıtty, dep habarlaıdy Almaty-akshamy.kz QazAqparatqa silteme jasap.
«Búgin biz qazaq-túrikmen qarym-qatynastarynyń strategıalyq sıpatyn taǵy da rastadyq jáne baýyrlas halyqtarymyzdy odan ári jaqyndastyrýǵa ózara umtylysymyzdy bildirdik. Dostyq pen ózara tıimdi túrde kópjosparly yntymaqtastyǵymyzdyń basymdyqtaryn aıqyndadyq. Saýda-ekonomıkalyq seriktestikke erekshe kóńil bólindi. Ótken jyldyń qorytyndysynda birlesken is-sharalardyń arqasynda ekijaqty taýar aınalymymyz eki esege artyp, 250 mln dollardan asty. Bıyl da oń dınamıka saqtaldy. 7 aıda ózara saýdanyń eki ese ósýi qamtamasyz etildi», – dedi Qasym-Jomart Toqaev.
Memleket basshysy úkimetaralyq baılanystar, sondaı-aq eki eldiń isker toptary arasyndaǵy baılanystar aıtarlyqtaı jandanǵanyn atap ótti.
«Ekonomıkanyń túrli salasynda birqatar joba iske asyrý satysynda tur. Sondyqtan, bizde saýda-ekonomıkalyq kooperasıany tereńdetý úshin aıtarlyqtaı rezervter bar dep sanaımyz. Osyǵan baılanysty biz ekonomıkalarymyzdyń ózara tolyqtyrylýyn eskere otyryp, eksportty ártaraptandyrý qajettigin belgiledik», - dedi Qasym-Jomart Toqaev.