Sot sheshimin oryndaý kezinde 5 adam qaza boldy: qaıtys bolǵandardyń ekeýi ýchaskelik polısıa ınspektory men sot oryndaýshysy
Atalǵan oqıǵa búgin keshke shamamen 17.00 -de boldy. Qaıǵyly jaǵdaı eki adamnyń menshik quqyǵyna qatysty daýy boıynsha sot sheshimin oryndaý kezinde oryn aldy, dep habarlaıdy Almaty-akshamy.kz.
QazAqparat agenttiginiń aqparaty boıynsha, sot sheshimimen tanysqan soń, jergilikti turǵyn úıge júgirip baryp, sot oryndaýshysyna, ýchaskelik polısıa ınspektorlaryna jáne aýlada bolǵan basqa adamdarǵa qarýdan oq jaýdyrdy. Bes adam, onyń ishinde qyzmette bolǵan eki polısıa qyzmetkeri, oqtan jaraqat alyp, kóz jumdy.
«Kúdikti arnaıy jasaq sarbazdarynyń qatysýymen qarý qoldanylmaı ustaldy, óıtkeni úıde áıelder men balalar boldy. Atalǵan fakt boıynsha QR Qylmystyq kodeksiniń 99-baby 2-bóligi («Kisi óltirý») boıynsha qylmystyq is qozǵaldy. Jasalǵan qylmys úshin 20 jylǵa deıin bas bostandyǵynan aıyrý nemese ómir boıyna bas bostandyǵynan aıyrý jazasy qarastyrylǵan»,- dedi Almaty qalalyq polısıa departamenti basshysynyń orynbasary Rústem Ábdirahmanov.
Qazirgi ýaqytta oqıǵa ornynda jedel tergeý toby jumys istep jatyr. Atys shyqqan jerdi polısıa qorshaýǵa aldy. Azamattardyń ómiri men densaýlyǵyna qaýip joq.
Esterińizge sala keteıik, búgin keshke Almatyda atys bolyp, 5 adamnyń qaza tapqanyn habarlaǵan edik.