Ótinimder 1 sáýirden beri qabyldanýda
Almatyda bıznes-ıdeıalardy iske asyrý úshin granttar alýǵa ótinimder qabyldaý bastaldy. Olarǵa jastar (29 jasqa deıin) jáne halyqtyń áleýmettik osal toptarynyń ókilderi úmitker bola alady, dep habarlaıdy Almaty-akshamy.kz
Grant somasy 400 AEK-ke jetedi (1 225 200 teńge).
Granttar berý jumyspen qamtýdy qamtamasyz etý jáne halyqtyń tabysyn ósirý maqsatynda kásipkerlikti damytý jónindegi Ulttyq jobany iske asyrý aıasynda júrgiziledi.
«SHOB qala ekonomıkasynda jetekshi orynǵa ıe jáne munda 10 almatylyqtardyń 6-y isteıdi. Osy jyldan bastap granttardy sertıfıkatsyz alýǵa bolady. Ótinimder sáýirden qarasha aralyǵynda qabyldanady, naqty merzimderi men kezeńderin qosymsha habarlaımyz», – dep atap ótti Almaty qalasy ákimdiginiń halyqty jumyspen qamtý ortalyǵy dırektorynyń orynbasary Zafar Appazov.
Ótinimdi aǵymdaǵy jyldyń 1 sáýirinen bastap business.enbek.kz portaly arqyly berýge bolady.
Grant alý úshin mynalar qajet:
* tirkelgen jumyssyz mártebesi nemese merzimi 1 jyldan aspaıtyn JK bolýy;
* Almaty qalasynda turaqty, ýaqytsha (1 jyldan kem emes) tirkelý;
* business.enbek.kz portalynda tirkelý;
* bıznes-jospardyń bolýy.
Úmitkerler bıznes-jospardy ózderi derbes jasaıdy jáne Business.enbek.kz. portalyna ótinim jiberedi. Ótinimderdi qaraý merzimi - 10 jumys kúni.
Granttardy komısıanyń sheshimi negizinde Halyqty jumyspen qamtý ortalyǵy beredi. Komısıa músheleri bıznes-jospardy kelesi krıterııler boıynsha baǵalaıdy:
-bıznes-ıdeıanyń básekege qabilettiligi;
- ótkizý naryqtarynyń pysyqtalýy;
- bıznes-jobanyń qarjylyq ómirsheńdigi;
- kásipkerlik daǵdylar deńgeıi;
- jańa jumys oryndaryn qurý.