Almaty qalasyndaǵy QR Ulttyq kitaphanasynda belgili jýrnalıs, QR Aqparat salasynyń úzdigi, Qazaqstan Jýrnalıser Odaǵy syılyǵynyń laýreaty, «Shalqar» radıosynyń qyzmetkeri Ońǵar Quraldyń «Biz qalaı sóıleımiz?» atty kitabynyń tanystyrylymy ótti. İs-sharaǵa ǵalymdar, qoǵam qaıratkerleri, jazýshylar, jýrnalıser men til janashyrlary qatysty, dep habarlaıdy aqshamnews.kz
Kitaptyń óńdelip, tolyqtyrylǵan ekinshi basylymyna avtordyń 2002-2005 jyldary Qazaq radıosy men "Shalqar" radıosynda efırge shyqqan «Biz qalaı sóıleımiz?» jáne 2011-2012 jyldardaǵy «Til mádenıeti» atty baǵdarlamalarynyń mátindik nusqalary engizilgen.
Bul eńbek qazaq tiliniń tazalyǵy, saýatty sóıleý men jazý, termınderdi durys aýdarý, sóz tirkesterin oryndy qoldaný sıaqty ózekti máselelerdi qamtıdy. Avtor kúndelikti qoldanylatyn sózderimizdiń durystyǵy men burystyǵyn saralap, tilge qatysty kókeıkesti suraqtarǵa jaýap beredi. Sonymen qatar, kitapta til taqyrybyna arnalǵan tanymal tulǵalardyń oı-pikirleri men naqty dáıekteri usynylǵan.
«Biz qalaı sóıleımiz?» jınaǵy stýdentter, mektep oqýshylary, ustazdar, jýrnalıser men qazaq tiliniń bolashaǵyna beıjaı qaramaıtyn oqyrmandar úshin asa paıdaly qural bolyp tabylady. Bul eńbek tildi jetik meńgerýge umtylǵan jáne ana tilin ardaq tutatyn barshaǵa baǵyttalǵan.
Kitaptyń basty maqsaty – til mádenıetin damytýǵa úles qosý, saýatty sóıleý men jazýdyń mańyzdylyǵyn dáripteý, sondaı-aq ana tiline degen qurmetti arttyrý.