Almaty qalasy bilim berý sapasyn qamtamasyz etý departamentiniń basshysy Gúlnar Ermekbaeva Óńirlik komýnıkasıalar qyzmetiniń brıfıńinde osy oqý jylynda bekitilgen tizim boıynsha menshik nysanyna qaramastan bilim berý uıymdary atestattaý rásiminen ótip jatqanyn málimdedi, dep habarlaıdy Almaty-akshamy.kz.
Spıkerdiń aıtýynsha, 2022 jylǵa 186 uıym (mektepke deıingi, orta bilim berý jáne TjKB uıymdary) josparlanǵan, 87 uıymda atalǵan rásim júrgizildi, onyń ishinde 33-i atestattalmaǵan, bul 38 paıyzdy quraıdy, atestattalmaǵan uıymdardyń negizgi bóligi – bul mektepke deıingi mekemeler.
Memlekettik atestattaý memlekettik jalpyǵa mindetti bilim berý standarty talaptarynyń saqtalýyn baqylaý jáne bilim berý uıymdaryna ádistemelik kómek kórsetý maqsatynda bilim berý uıymdaryna barmaı profılaktıkalyq baqylaý boıynsha ótkiziledi.
Memlekettik atestattaý aıasynda oqýshylardyń bilimin baqylaý, ata-analarǵa saýalnama júrgizý, bilim berý uıymdarynyń ózin-ózi baǵalaýy jáne t.b. kózdeledi.
«Áleýmettik jelilerde departamenttiń resmı akkaýnttary ashylǵanyna nazar aýdarǵym keledi, halyqpen jedel keri baılanys ornatý jáne qysqa merzimde kómek kórsetý maqsatynda meniń jáne orynbasarymnyń jeke baılanys telefon nómirleri jarıalandy. Bul akkaýnttar jumysynyń nátıjesi jedel saýalnama, ýaqtyly kómek kórsetý bolyp tabylady, búgingi kúni halyqpen qarym-qatynas salasynda aıtarlyqtaı júıeli ilgerileý baıqalady. Departamentte turaqty negizde azamattardy jeke máseleleri boıynsha qabyldaý júrgiziledi», - dep atap ótti G. Ermekbaeva.
"Sonymen qatar tegin konsýltasıalyq kómek kórsetetin bala.gov.kz veb-saıty iske qosylyp, búgingi kúni mektepte, úıde jáne kóshede qıyndyqtarǵa tap bolǵan oqýshylarǵa jáne olardyń ata-anasyna kómek kórsetilýde. Balalar jáne olardyń ata-analary QR-saıtty ár mektepte ornatylǵan taqtaıshadan skanerleý arqyly «Balaqorgau» saıtyna óte alady. Saıtta problemalyq jaǵdaılardy sheshý boıynsha keńestermen tanysa alasyzdar. Sonymen qatar, úlgini toltyryp, mamanmen jeke keńes alýǵa múmkindik bar.
Balalardyń quqyqtaryn buzý týraly árbir jaǵdaı mán-japsary anyqtalyp, tolyq sheshimin tapqanǵa deıin baqylaýda bolady", - dep atap ótti spıker.