Jalaqynyń 80 paıyzyn jumys berýshi emes ákimdik tóleıdi
Almatyda bıyl múgedektigi bar 500-den asa azamat jumyspen qamtylǵan, dep habarlaıdy Almaty-akshamy.kz Almaty.tv-ge silteme jasap.
Qala ákimdigi múgedektigi bar jandardy qoǵamdyq jumysqa aralastyrý úshin jumys berýshilerge qazynadan 80 paıyzdyq sýbsıdıa bólipti. Bul kásipker úshin de, erekshe qajettiligi bar adamdar úshin de tıimdi.
Aman Oralbaıuly qazir aýdıokitaptardy montajdap, redaksıalaýmen aınalysyp júr. Múgedektigi bar balalar men eresekterge telefon, kompúter qoldanýdy úıretedi, ıaǵnı tıflomaman. Qazir eńbek etip jatqan qoǵamdyq birlestikke «Jumyspen qamtý» ortalyǵy arqyly qańtarda ornalasypty.
«Qudaıǵa shúkir, qazir jumys tabylǵany. Ózimizdiń mamandyǵymyz boıynsha jumys istep jatyrmyz ǵoı. Osy jer unaıdy, qoǵamdyq uıym. Ujymmen aralasyp, ýaqytymyz óte kóńildi ótip jatyr. Jumys yńǵaıly», – dedi tıflopedagog Aman Oralbaıuly.
Kishkentaıynan kózi kórmese de qoǵamnyń damýyna, ózi sıaqty erekshe qajettiligi bar adamdardyń ómirin jeńildetýge osylaı úlesin qosyp keledi. Salada 10 jylǵa jýyq tárijıbesi bar. Munda ózi sıaqty jumys isteıtin 25 adam bar. Onyń basym bóligi memleket bólgen sýbsıdıa arqyly jumyspen qamtylǵan.
«Sýbsıdıanyń arqasynda biraz adamdy jumysqa alyp otyrmyz. Bizdiń uıymnyń maqsaty paıda tabý emes, kerisinshe osy múgedektigi bar jandardy qoǵamdyq jumysqa tartý, áleýmetpen aralastyrý. Sondyqtan mundaı sýbsıdıa bizge jaqsy paıdasyn tıgizip jatyr», – dedi «Jan» múgedekter quqyǵyn qorǵaý qoǵamdyq birlestik tóraǵasynyń orynbasary Ilás Fatkýlın.
Kásipkerlikti damytýdyń ulttyq jobasy boıynsha elimizde jergilikti búdjetten múgedektigi bar jandardy jumyspen qamtý úshin 50 paıyz sýbsıdıa bólinýi mindetteledi. Al Almaty ákimdigi qarjy kólemin 80 paıyzǵa jetkizgen. Sonyń esebinen bıyl 500-den asa azamat jumysqa turypty. Iaǵnı jalaqynyń 80 paıyzyn jumys berýshi emes ákimdik tóleıdi.
«Ákimshilik tarapynan 2021 jyldyń qarashasynda múgedektigi bar azamattardy jumyspen qamtý úshin kvota bekitilgen. 2-4 paıyz aralyǵynda iri jáne orta kásiporyndar múgedektigi bar azamattardy jumyspen qamtý qajet», – dedi Jumyspen qamtý jáne áleýmettik baǵdarlamalar basqarmasy basshysynyń orynbasary Danıar Álkebaıuly.
Al mindettemelerdi oryndamaǵan jeke ne memlekettik uıymdarǵa aıyppul nemese ákimshilik kodekske sáıkes sharalar qoldanylady. Búginde qalada múgedektigi bar 55 myń adam bolsa, sonyń 19 myńy jumysqa jaramdy. 19 myń adamnyń 25 paıyzy jumyspen qamtylǵan. Olar – áleýmettik qyzmetker, jattyqtyrýshy, zańger men ekonomıs, muǵalim.