Qazaqstan Respýblıkasy Prezıdenti janyndaǵy Ortalyq komýnıkasıalar qyzmetinde ótken baspasóz konferensıasynda Almaty ákimi Baqytjan Saǵyntaev densaýlyq saqtaý júıesi men bilim berýdi damytý jáne modernızasıalaý týraly aıtty.
Densaýlyq saqtaý salasyn odan ári damytý maqsatynda bıylǵy jyly Almatyda balalarǵa jedel medısınalyq kómek kórsetý ortalyǵynyń ota jasaý blogy qabyldaý bóliminiń jańa korpýsyn salý josparlanýda.
Qulja traktisinde aýrýhanalyq klasterdi damytý josparlanýda, munda onkologıalyq ortalyq pen JQTB ortalyǵy bar pallıatıvti kómek ortalyǵy salynatyn bolady.
Medısınalyq qyzmetterdiń qadamdyq qoljetimdiligin qamtamasyz etý maqsatynda bıyl árqaısysy 200 kelýshige arnalǵan tórt otbasylyq-dárigerlik ambýlatorıa salý josparlanýda.
Almatynyń medısınalyq uıymdarynda kadr tapshylyǵyn joıý jobasy maquldandy. Óte tapshy medısınalyq mamandyqtar boıynsha rezıdentýrada oqý úshin 120 grant bólinedi. Biliktilikti arttyrý aıasynda 5 aıda 1253 dáriger men meıirbıke, sondaı-aq vaksınalaý ortalyqtarynda jumys isteıtin myńǵa jýyq eriktiler – stýdentter, ınternder men rezıdentter bilimderin jetildirdi.
Medısına qyzmetkerlerin qoldaý maqsatynda kótermeleý tólemderi men jalaqyǵa ústeme aqy belgilendi, sonymen qatar jas dárigerlerdiń «Almaty jastaryna» qatysýyna múmkindikteri bar.
Almatyda bilim berý salasynda 278 mektep bar, onyń 207-si memlekettik, 71-i jeke menshik, bularda barlyǵy 288 887 oqýshy oqıdy. Bıylǵy oqý jylynda 11,5 myń túlek mektep bitirdi. 900 túlek úzdik atestat, 621-i «Altyn belgi» aldy.
Qoljetimdi orta bilim berý úshin 12,6 myń oryndy segiz memlekettik mekteptiń, 1,7 myń oryndy alty jeke mekteptiń, 8 263 oryndy 17 jańa mekteptiń qurylysy júrýde, sondaı-aq tórt mektep seısmıkalyq nyǵaıtylýda. Bul sharalar jyl sońyna deıin 21 myńnan astam jańa oqýshy oryn qurýǵa múmkindik beredi.
Mektepke deıingi bilim berý salasynda 65 962 balany qamtyǵan 832 mekeme bar. Oryn tapshylyǵyn azaıtý jumysy jalǵasýda, qazirgi kezde 640 oryndy tórt memlekettik balabaqsha salynýda. Bulardy jyldyń sońyna deıin paıdalanýǵa berý josparlanýda. Jyl basynan beri 1,7 myń oryndy 30 jeke mektepke deıingi mekeme ashyldy. Jyl sońyna deıin 5 myń oryndy taǵy 35 jeke balabaqsha ashý josparlanýda. Memlekettik tapsyrysta 20 441 oryndy 397 mektepke deıingi mekeme qarastyrylǵan.
Jyl sońyna deıin 3-ten 6 jasqa deıingi balalardy qamtýdy 91%-ǵa deıin arttyrý josparlanýda. Búgingi kúni bul 89,7% quraıdy.
Balalar men jasóspirimderdiń jan-jaqty damýy úshin qosymsha bilim berý aıasyn keńeıtýdiń tetikteri iske asyrylýda. Máselen, Almatyda memlekettik shyǵarmashylyq tapsyrysty jan basyna shaqqanda normatıvtik qarjylandyrý jobasy júzege asyrylady. Bul 4 pen 17 jas aralyǵyndaǵy balalarǵa sport seksıalaryna jáne shyǵarmashylyq úıirmelerge tegin qatysýǵa múmkindik beredi.
Bıylǵy jyly 4,2 myńnan astam balalar men jasóspirimderdi tegin úıirmelermen qamtý josparlanýda. Jan basyna shaqqanda qarjylandyrý aıasynda 4,5 myń adam sporttyq seksıalarǵa tegin qatysa alady.
Almatyda jyl sońyna deıin sporttyq ınfraqurylymmen qamtamasyz etý úshin Jetisý, Alataý, Medeý jáne Túrksib aýdandarynda alty deneshynyqtyrý-saýyqtyrý kesheni salynady. Árqaısysy táýligine 5 myńǵa jýyq adamdy qabyldaıtyn bolady.