Almatyda ekologıany jaqsartý boıynsha keshendi sharalar qabyldanýda
Megapolıs ákimi Baqytjan Saǵyntaev QR Prezıdenti janyndaǵy Ortalyq komýnıkasıalar qyzmetinde ótken baspasóz konferensıasynda ekologıany jaqsartý jáne qoǵamdyq keńistikterdi abattandyrý sharalary týraly aıtty, dep habarlady Almaty-akshamy.kz.
Ótken eki jyl ishinde 72 qoǵamdyq keńistik abattandyryldy. Bıyl qalanyń barlyq aýdandaryndaǵy 23 keńistikte jumystar júrýde. Saıran kólin abattandyrý jobasy jasalýda.
Memleket basshysynyń tapsyrmasy boıynsha JEO-yn gazǵa kóshirý jobasy júzege asyrylýda. Qurylys-montaj jumystary 2022 jyly bastalyp, 2025 jyly aıaqtalatyn bolady.
Ekomonıtorıng júıesin damytý aıasynda 9 ekopost ornatylýda, jyl sońyna deıin taǵy 10-y kezeń-kezeńimen jumys isteı bastaıdy.
Ekinshi jyl qatarynan 3 jylda 1 mıllıon aǵash otyrǵyzý boıynsha «Jasyl Almaty» baǵdarlamasy júzege asyrylýda. Qazirdiń ózinde 480 myń túrli aǵash kóshetteri otyrǵyzyldy. Jyl sońyna deıin 300 myńnan astam jas aǵash otyrǵyzý josparlanýda.
Ár aǵashqa elektrondyq pasport jasalyp, jasyl jelekterdiń reestri quryldy. Júıe jalpyǵa qoljetimdi bolady.
Aǵymdaǵy jyly biz aǵash otyrǵyzýǵa jáne kesýge ruqsat berý prosesin avtomattandyramyz.
Ekologıalyq máseleler boıynsha azamattyq qoǵammen ózara baılanys ornatyldy. İskerlik keńes aıasynda jumys toby qurylyp, onyń quramyna ekologtar, sarapshylar jáne belsendiler endi.