Osy maqsattarǵa 24,8 mlrd teńge bólindi.
QR Prezıdenti janyndaǵy Ortalyq komýnıkasıalar qyzmetinde ótken baspasóz konferensıasynda Almaty ákimi Baqytjan Saǵyntaev halyqtyń áleýmettik osal toptaryn qoldaý sharalary týraly aıtty dep habarlaıdy Almaty-akshamy.kz.
Qoldaýdyń barlyq sharalarymen 124 myńǵa jýyq almatylyq qamtylǵan. Osy maqsattarǵa 24,8 mlrd teńge bólindi. 150 oryndy ońaltý ortalyǵyn, sondaı-aq táýligine 500 kelýshini qabyldaıtyn múmkindigi shekteýli jandarǵa arnalǵan sport keshenin salý josparlanýda.
Áleýmettik ál-aýqat basqarmasynyń burynǵy ǵımaratyn psıhonevrologıalyq patologıasy bar tulǵalar úshin kópbeıindi ońaltý ortalyǵy retinde qaıta jasaý josparlanǵan.
Keler jyly Sábıler úıiniń bos turǵan ǵımaratyn týmysynan múgedek balalarǵa jastaıynan qoldaý úshin ortalyǵyna rekonstrýksıalaý bastalady.
Erekshe qajettiliktegi balalarǵa jáne psıhonevrologıalyq patologıasy bar ári tirek-qımyl apparaty buzylǵan eresekter úshin Áleýmettik qyzmet kórsetý ortalyǵyn qurýdyń jobalyq-smetalyq qujattamasy ázirlenýde.
Ótken jyly áleýmettik az qamtylǵan otbasylardyń balalary úshin «Shyńǵa órleý» jobasy iske qosyldy. Qalada klýbtyń 10 fılıaly ashyldy. Bıyl olarda 1,2 myńnan astam bala bilim aldy.
Múmkindigi shekteýli jandardy jumyspen qamtý úshin byltyrdan bastap Ten Qogam áleýmettik qoldaý ortalyǵy» jobasy iske asty. «Baqytty otbasy» ortalyqtary az qamtylǵan jáne kóp balaly otbasylarǵa jan-jaqty kómek alýdyń biryńǵaı alańyna aınaldy. Qazir olardyń sany 9-ǵa jetti. Bıylǵy jyly ortalyqtardyń qyzmetin 24 myńnan astam adam paıdalandy.
Almatyda «Belsendi uzaq ómir» jobasynyń 9 ortalyǵy bar, olarda 23,4 myńnan astam zeınetker tirkelgen.
Áıelder kásipkerligin damytýdyń «ISKER ANA» baǵdarlamasy júzege asyrylýda. 2020 jyldan bastap 776 áıel tegin grant alyp, jeke bıznesterin ashty.
Jyl basynan beri «Baqytty otbasy» baǵdarlamasy boıynsha turǵyn úıdi jyldyq 2% mólsherlememen nesıege satyp alý múmkindikteri otbasylardyń sany 3,7 esege, ıaǵnı 272-den 1010 otbasyǵa ósti. Bular – 463 kópbalaly otbasy, múgedek balalardy tárbıelep otyrǵan 458 otbasy, 89 tolyq emes otbasy.
Bastapqy tólemdi jabý úshin jergilikti búdjetten árqaısysy 1 mıllıon teńgeden turatyn turǵyn úı sertıfıkattaryna 2 mıllıard teńge bólindi. Olardy kópbalaly otbasylar, múgedek balalary bar otbasylar, ata-anasyz qalǵan jetim balalar, sondaı-aq «Baqytty otbasy» jáne «Shańyraq» baǵdarlamalary aıasynda 1 jáne 2 top múgedekteri paıdalana alady.