28 mln teńgeden astam búdjet qarajatyn jymqyrý áreketteri áshkerelendi
Qarjylyq monıtorıń agenttiginiń Almaty qalasy boıynsha aýmaqtyq departamentiniń qyzmetkerleri «Almaty qalasy Túrksib aýdany ákiminiń apparaty» KMM abattandyrý bóliminiń basshysy men «Astana-Kýrylys HHİ» JSHS basshysyna qatysty búdjet qarajatyn jymqyrý faktisi boıynsha sotqa deıingi tergep-tekserýdi aıaqtady. Bul týraly agenttiktiń baspasóz qyzmeti málimdedi, dep habarlady Almaty-akshamy.kz
Belgili bolǵandaı, merdiger «Astana-Kýrylys HHİ» JSHS men Túrksib aýdany ákimdiginiń abattandyrý bólimi arasynda 71 mln teńgeden astam somaǵa «Bas Qarasý» ózeniniń arnasyn qaıta jańartýǵa shart jasalǵan. Alaıda atalǵan qujatqa jalǵan málimetterdiń jazylǵany anyqtaldy.
«JSHS basshysy 2019 jyldyń tamyzynan qyrkúıekke deıin aýdan ákimdiginiń laýazymdy tulǵasynyń kómegi arqasynda oryndalǵan jumystar aktilerine jalǵan málimetter engizý arqyly jalpy somasy 28 mln teńgeden astam búdjet qarajatyn jymqyrý áreketteri jasaldy. Bólim basshysy K.Voropaev pen «Astana-Kýrylys HHİ» JSHS basshysy E.Isaev 7 jáne 7,5 jylǵa bas bostandyǵynan aıyryldy», - delingen habarlamada.