Qazaqstan Respýblıkasy Qorǵanys mınıstrligi Bitimgerlik operasıalar ortalyǵynda «BUU bitimgerlik operasıalaryndaǵy genderlik aspektiler» atty pılottyq kýrsy uıymdastyryldy.
Atalǵan kýrstyń baǵdarlamasyn Qorǵanys mınıstrliginiń Bitimgerlik operasıalar ortalyǵynyń nusqaýshylary ázirledi, dep habarlaıdy Almaty-akshamy.kz.
Kýrs tyńdaýshylaryna arnalǵan dáristerdi 2-synyptyń tótenshe jáne ókiletti ókili – Qazaqstandaǵy «BUU-áıelder» qurylymynyń bas keńesshisi Madına Jarbosynova, zań ǵylymdarynyń PhD doktory Halıda Ájiǵulova, «Qazaqstannyń qoǵamdyq quqyqtar jáne teń múmkindikter ınstıtýty» qoǵamdyq qorynyń prezıdenti, ARASHA turmystyq zorlyq-zombylyq qurbandaryna arnalǵan baspana dırektory Margarıta Óskembaeva oqıdy.
– Qarýly qaqtyǵystar oryn alatyn turaqsyz aımaqtarda eń osal sanattaǵylar – áıelder men balalar. Sondyqtan áıelderdiń BUU bitimgerlik mısıalaryna qatysýy óte mańyzdy. Olar máselelerdi beıbit jolmen retteýge, osy sanattaǵy azamattardyń quqyqtaryn qorǵaýǵa yqpal etedi. Bul turǵyda ulttyq kontıngentti genderlik aspektini eskere otyryp daıyndaý erekshe mańyzdy, – dep atap ótti Bitimgerlik operasıalar ortalyǵy bastyǵynyń oqý jumysy jónindegi orynbasary polkovnık Rýslan Maermanov.
Kýrstardy Qarýly kúshterdiń, UQK Shekara qyzmetiniń, Tótenshe jaǵdaılar mınıstrliginiń, İshki ister mınıstrliginiń, Ulttyq ulan jáne Bas prokýratýranyń áıelderine ótkizedi. Tyńdaýshylar bitimgerlik operasıalarǵa qoldanylatyn halyqaralyq quqyqtyń negizderimen, halyqty qorǵaýdyń quqyqtyq negizderimen jáne tujyrymdamasymen tanysady. Odan bólek jynystyq qanaý jáne qarýly qaqtyǵysqa baılanysty zorlyq-zombylyq taqyryptary da qarastyrylady.
Sabaqtar BUU Qaýipsizdik Keńesiniń «Áıelder, beıbitshilik jáne qaýipsizdik» 1325 (2000) qararyn iske asyrý máselelerinde tyńdaýshylardyń habardarlyǵyn arttyrady. Jalpy bul pılottyq joba Qazaqstandaǵy áıelderdiń jaǵdaıyn jaqsartý jáne QR Qarýly kúshteriniń BUU bitimgerlik mısıalaryna qatysýyn keńeıtý jónindegi Ulttyq is-qımyl josparynyń maqsattaryna qol jetkizýge baǵyttalǵan.