Ulttyq qaýipsizdik komıtetiniń Qyzylorda jáne Shyǵys Qazaqstan oblystary boıynsha departamentteri prokýratýra organdarymen ózara is-qımyl jasaı otyryp, óńirlerde Ulttyq biryńǵaı testileýdi (UBT) jáne pedagogterdiń bilimin baǵalaýdy (PBB) júrgizýge jaýapty uıymnyń jeke qyzmetkerleriniń testileý prosesine zańsyz aralasý áreketin tyıdy, dep habarlaıdy Almaty-akshamy.kz.
Komıtettiń baspasóz qyzmeti taratqan málimet boıynsha, kúdiktiler arnaıy baǵdarlamalardy qoldaný arqyly talapkerler men pedagogtardyń qyzyǵýshylyq tanytqan kompúterlerine qashyqtan qosylǵan. Sóıtip, aqshalaı syıaqy úshin olarǵa testten joǵary nátıjeler alýǵa járdem kórsetken.
«19 shildede 3 negizgi kúdikti ustaldy. Tintý barysynda qashyqtan qosylýdy qamtamasyz etetin tehnıkalyq qurylǵylar men baǵdarlamalar, aqshalaı qarajat jáne ózge de zattaı dáleldemeler tárkilendi.Qazaqstan Respýblıkasy Qylmystyq kodeksiniń 207 «Aqparattyq júıeniń nemese telekomýnıkasıalar jelisiniń jumysyn buzý») jáne 210 baptary («Zıan keltiretin kompúterlik baǵdarlamalar men baǵdarlamalyq ónimderdi jasaý, paıdalaný nemese taratý») boıynsha sotqa deıingi tekserý jumysy bastaldy. Qylmystyq-prosestik kodekstiń 201-babyna sáıkes ózge aqparat tergeý múddesinde jarıa etilmeıdi», - dep jazylǵan habarlamada.
Aıta keteıik, 2022 jyly Ulttyq qaýipsizdik komıteti osyǵan uqsas qylmystar jasaǵany úshin 6 adamdy qylmystyq jaýapkershilikke tartty.