Polıseıler jedel sharalar qabyldap jatyr.
Almaty polısıasy jalǵan vaksınasıa tólqujatyn qandaı medısınalyq mekemeler jasaǵanyn aıtty, dep habarlaıdy Almaty-akshamy.kz.
İshki ister mınıstrliginiń resmı saıtyndaǵy derekke júginsek, bul týraly tártip saqshylary ZOOM beıneplatformasy arqyly ótken medısınalyq mekemelerdiń arnaıy jınalysy kezinde habarlaǵan.
«Turaqty negizde ınternet-resýrstarǵa jáne buqaralyq aqparat quraldaryna monıtorıń júrgizilýde, medısınalyq anyqtamalardy qoldan jasaý faktilerin anyqtaý boıynsha jedel sharalar qabyldanýda. Eske salaıyq, jaqynda azamattardy Saýd Aravıa Koróldigine jiberý úshin 140-tan astam jalǵan vaksına tólqujatyn jasaýmen aınalysqan týrısik kompanıa anyqtaldy. Sonymen qatar, tergeý satysynda №21, №4, №16 jáne №13 qalalyq emhanalardyń jalpy tájirıbelik dárigerlerine qatysty qylmystyq ister qaralýda. Olar kirgen azamattarǵa vaksınasıany salmaı-aq, dozanyń birinshi komponentin qabyldaý týraly jalǵan derekterdi bazaǵa engizgen nemese vaksına bólmesinde beınebaqylaý kamerasy bolsa, olar ekpeni alǵandaı etip kórsetip ekpe salynǵan oryndy plasyrmen jabystyrǵan. Bul qyzmetterdiń barlyǵy aqshalaı syıaqy úshin usynylǵandyǵy anyq», – dedi óz sózinde Almaty qalalyq polısıa departamenti bastyǵynyń birinshi orynbasary Nurlan Almasbekov.
Sonymen qatar, spıker jalǵan qujat jasaǵany úshin qylmystyq jaýapkershilik 4 jylǵa deıin bas bostandyǵynan aıyrý túrinde ekendigin, al ony qoldanǵany úshin 40 táýlikke qamaýǵa alý túrinde qarastyrylǵanyn eske túsirdi. Sondaı-aq, joǵaryda atalǵan azamattardyń áreketterinde «qyzmettik jalǵandyq» belgileri bar, ıaǵnı, jalǵan aqparatty resmı qujattarǵa engizý.
«Qurmetti medısına qyzmetkerleri, ózińizdi qylmystyq iske tartýǵa jol bermeńiz jáne otbasyńyz ben dostaryńyzdy osydan qorǵańyz», – dep qorytyndylady Almasbekov.
