Almaty Theatre sahnasynda Roza Baǵlanova atyndaǵy «Qazaqkonsert» memlekettik akademıalyq konserttik uıymynyń «Birlik» ansambliniń konserti ótti.
Mádenıet jáne aqparat mınıstrliginiń qoldaýymen uıymdastyrylǵan gala-konsert Qazaqstan halqy Assambleıasynyń 30 jyldyǵyn merekeleý aıasyndaǵy 2025 jyldyń basty oqıǵalarynyń biri boldy, dep habarlaıdy aqshamnews.kz.
Mádenıet jáne aqparat mınıstrligi baspasóz qyzmetiniń málimetinshe, konserttik baǵdarlamada Qazaqstan, Reseı, Ózbekstan jáne Tatarstannyń tanymal horeograftarynyń qoıylymdary usynyldy.
Konsertti Qazaqstan Respýblıkasynyń mádenıet jáne aqparat mınıstri Aıda Balaeva, sondaı-aq mádenıet, óner jáne qoǵam qaıratkerleri tamashalady.İs-sharaǵa Roza Baǵlanova atyndaǵy «Qazaqkonsert» memlekettik akademıalyq konserttik uıymynyń «Astana sazy» qazaq memlekettik fólklorlyq ansambli, Qurmanǵazy atyndaǵy Qazaq ulttyq konservatorıasy, Respýblıkalyq memlekettik akademıalyq koreı mýzykalyq komedıa teatry, P.I. Chaıkovskıı atyndaǵy Almaty mýzykalyq kolejiniń «Dostlýq» uıǵyr halyq aspaptar ansambli, «Rýhsara» bı ujymy, «Nava» ansambli jáne «Bahar» kavkaz bı ansambli qatysty.
Belgili óner sheberleri men jas oryndaýshylar jappaı jáne jeke horeografıalyq kompozısıalar, aspaptyq jáne vokaldyq nómirlerdi oryndady. Olardyń qatarynda «Kúı shashý» bıi, halyq ánderinen popýrrı, uıǵyr, koreı, tatar bıleri jáne basqa da qoıylymdar boldy.
Mádenıet jáne aqparat mınıstrliginiń atynan shyǵarmashylyq ujymǵa yqylas gúli tartý etildi.
Aıta keteıik, «Birlik» ansambli 2024 jyldyń 1 naýryzynda quryldy. Bul – Qazaqstan men TMD-daǵy alǵashqy kópultty án men bı ansambli. Ujymnyń biregeı repertýary qazaq halqynyń tarıhymen jáne táýelsiz Qazaqstannyń qalyptasýymen tyǵyz baılanysty 130 etnostyń mýzykalyq murasy men ónerin qamtıdy.