Roza Rymbaeva jáne basqa da estrada juldyzdary Almatynyń bas shyrshasynyń shamdaryn jaǵý kezinde óner kórsetedi, dep habarlaıdy aqshamnews.kz
Búgin Almatydaǵy barlyq 80 shyrshanyń shamdary 19:00-de jaǵylady. Bas shyrshanyń shamyn jaǵý rásimi Abaı atyndaǵy alańda ótedi. Bıiktigi 25 metr bolatyn shyrshany bezendirý úshin 6 shaqyrym gırlánda, sándik elementter, shyrsha sharlary, iri banttar jáne qaıta óńdelgen ekologıalyq qaýipsiz materıaldardan jasalǵan jańa jyldyq oıynshyqtar paıdalanyldy.
Shyrsha shamdaryn jaǵý rásimine deıin, saǵat 18:00-de Abaı alańyndaǵy Respýblıka Saraıynyń aldynda «Almatynyń 8 keremeti: otbasylyq mereke — tańǵajaıyp Jańa jyl» atty aýqymdy shoý bastalady. İs-sharada Roza Rymbaeva, Turar, Baljan Bıdash, «Álfa» toby, Dınara, Nazym Ádildına, Mádı Rymbaev, Dakelot, «Astra» toby, Adill jáne Malika Yes jáne basqa da estrada juldyzdary óner kórsetedi (kirý tegin).
Abaı alańyna kelgen qala turǵyndary men qonaqtaryn Kúlbıke kúımesi, Zimbir adam jáne basqa da ertegi keıipkerleri qarsy alady. İri ári jarqyn fotozonalar, jarqyraǵan sýburqaqtar jáne basqa da ınstallásıalar halyqqa erekshe merekelik atmosfera syılaıdy. İs-sharaǵa kelgen qonaqtar estelik fotosýret jasap, jańa jyldyq beıne túsire alady.
Sonymen qatar, Abaı alańynda 2024 jyldyń 20 jeltoqsanynan 2025 jylǵy 5 qańtarǵa deıin merekelik jármeńke ótedi. Munda qolóner buıymdary, kádesyılar jáne jańa jyldyq oıynshyqtar usynylady.
Saǵat 18:00-den bastap merekelik is-sharalar qalanyń 8 aýdanynda da ótedi:
Alataý aýdanynda – «Alataý» dástúrli óner teatrynyń aýmaǵynda (Nurkent shaǵyn aýdany, 6).
Almaly aýdanynda – Ǵabıt Músirepov atyndaǵy Qazaq memlekettik akademıalyq balalar men jasóspirimder teatrynyń aýmaǵynda (Abylaı han dańǵyly, 38).
Áýezov aýdanynda – N.Sas atyndaǵy memlekettik akademıalyq orys balalar men jasóspirimder teatrynyń aýmaǵynda (Shalápın kóshesi, 22).
Bostandyq aýdanynda – «Atakent» kórme ortalyǵynyń alańynda (Tımırázev pen Áýezov kósheleriniń qıylysy).
Medeý aýdanynda – Dostyk Plaza saýda oıyn-saýyq ortalyǵynyń aýmaǵynda jáne Dostyq dańǵyly, 85a/1 mekenjaıynda.
Naýryzbaı aýdanynda – Amfıteatr alańynda (Shuǵyla shaǵyn aýdany, 347).
Túrksib aýdanynda – №6 Oqýshylar úıiniń aýmaǵynda (Seıfýllın dańǵyly, 13/1).
Jetisý aýdanynda – Aınabulaq shaǵyn aýdanyndaǵy Arbatta (Maqataev pen Jumabaev kósheleriniń qıylysy).