Álemge áıgili kóterilisshilerge qarsy kúres jáne jýnglıdegi soǵys qımyldary mektebiniń bazasynda uıymdastyrylǵan kýrsqa Qarýly kúshterdiń Desanttyq-shabýyldaý áskerleriniń 15 áskerı qyzmetshisi qatysýda.
Oqý orny áskerı akademıa mártebesine ıe jáne dástúrli emes soǵystar kezinde jaýyngerlik áreketterdi zertteýge jáne oqytýǵa mamandandyrylǵan, dep habarlaıdy aqshamnews.kz Qorǵanys mınıstrligine silteme jasap.
Ol Jýnglı jaǵdaıynda kóterilisshilermen jáne partızandarmen kúresý úshin úndi áskerı qyzmetkerlerin daıyndaıdy.
– Kelgennen keıin mektep nusqaýshylary bizdi kýrs baǵdarlamasymen tanystyrdy. Bizdiń toppen ótkiziletin sabaqtarda kóterilisshilerdiń shaǵyn toptaryn qýdalaý jáne torýyl uıymdastyrý boıynsha is-sharalar pysyqtaldy. Praktıkalyq oqytý kúndiz-túni Jýnglı jaǵdaıynda júrgiziledi, – dedi Desanttyq-shabýyldaý áskerleri qolbasshysynyń basqarma ofıseri kapıtan Vıtalıı Stefanovıch.
Oqytý dárister, pikirtalastar, jaǵdaılyq zertteýler júrgizýdi kózdeıdi. Dene shynyqtyrýǵa, reflektorlyq atýdy damytýǵa jáne taktıkalyq ádisterdi ıgerýge kóp kóńil bólinedi.
Tyǵyz ósimdikter, shekteýli kóriný jáne turaqty qaýip-qater jaǵdaıynda jattyǵý kezinde áskerı qyzmetshilerge tiri qalýǵa ǵana emes, sonymen birge urys qımyldaryn júrgizýge de úıretiledi. Praktıkalyq is-sharalarǵa terrorısterdiń ımıtasıalary boıynsha jaýyngerlik oq-dárilerdi atý kiredi. Bul naqty urys jaǵdaılaryn qalpyna keltirýge múmkindik beredi.
Sonymen qatar, bilim alýshylar tótenshe jaǵdaılarda áreket etýge jáne jergilikti turǵyndarmen baılanys ornatýǵa múmkindik beretin psıhologıalyq daıyndyqtan ótedi.
Múldem beıtanys klımattyq jáne geografıalyq jaǵdaılar Desanttyq-shabýyldaý áskerleriniń áskerı qyzmetshilerine urys qımyldaryn júrgizýdiń jan-jaqty tájirıbesin beredi.
Bul Úndistannyń áskerı qyzmetshilerimen birlesip ótkizilgen bıylǵy ekinshi jattyǵý. Máselen, qazan aıynda "Sýrá" oqý ortalyǵynyń bazasynda "QazÚndi-2024" oqý-jattyǵýy ótti. Oǵan "Ońtústik" óńirlik qolbasshylyǵy men Desanttyq-shabýyldaý áskerleri áskerı qyzmetshileriniń quramynan quralǵan birlesken rota qatysty.
Qazaqstan men Úndistannyń qorǵanys vedomstvolarynyń ekijaqty yntymaqtastyǵy sheńberinde uıymdastyrylǵan is-shara 30 jeltoqsanǵa deıin jalǵasady.