Almaty jasyl aımaqta.
Bul týraly Almaty qalasynyń Óńirlik komýnıkasıalar qyzmetiniń alańynda Almaty qalasy Sanıtarlyq-epıdemıologıalyq baqylaý departamenti basshysynyń orynbasary Ásel Qalyqova aıtty. Soǵan qaramastan, onyń aıtýynsha, megapolıstegi jaǵdaı turaqty, «jasyl» aımaqta ornalasqan, dep habarlaıdy Almaty-akshamy.kz.
SEBD statısıkasyna sáıkes, sońǵy aptada KVI juqtyrý jaǵdaıynyń 1,2%-ǵa azdap óskeni baıqalady. Osylaısha, ótken 7 kúnde 155 juqtyrý jaǵdaıy anyqtalsa, osy joly 187 jaǵdaı tirkeldi. Kovıd naýqastaryna arnalǵan tósek-oryndarynyń 100 000 adamǵa shaqqandaǵy toltyrylý deńgeıi 9,2 (27 adam) nemese bólingen 450 tósek-orynnyń 6%-yn quraıdy.
«Sońǵy 7 kúnde ınfeksıanyń negizgi oshaqtary retinde saýda nysandary – 33,3%, qoǵamdyq kólikter – 41,6%, bazarlar – 5,4%, basqa óńirlerge saparlar – 6,5% boldy», - dedi Á.Qalyqova.
Sondaı-aq spıkerdiń aıtýynsha, otbasynda naýqas adammen baılanys– 7,1%, týystary men kórshilerine barý kezinde – 3,0%, jumys ornynda – 3,0% juqtyrý jaǵdaılary anyqtalǵan. Aýrý juqtyrǵandardyń kópshiligi 20-39 jas aralyǵyndaǵylar – 46,5% jaǵdaı. Odan keıingi orynda 40-59 jas aralyǵyndaǵy azamattar – 22%, sondaı-aq 60 jáne odan joǵary jastaǵylar – 16%.
Balalar men jasóspirimder arasynda bul vırýsty juqtyrý deńgeıi áldeqaıda tómen: 1 jasqa deıingi balalar – 6,4%, 14 jasqa deıingiler – 4,3%, 15-19 jas aralyǵyndaǵy jasóspirimder men jastar – 6,9%.
Brıfıń sońynda Á.Qalyqova 6 aı saıyn belsendi túrde vaksınasıa alý kerektigin, adam kóp jınalatyn jerlerden aýlaq bolýdy, al kelýshiler kóp jınalatyn qoǵamdyq oryndarda bolý qajet bolǵan jaǵdaıda medısınalyq betperde kıýdi, áleýmettik qashyqtyqty jáne jeke bas gıgıenasyn saqtaýǵa keńes berdi.
Aıta keteıik, Almatyda indet bastalǵannan bıylǵy 4 jeltoqsanǵa deıin koronavırýstyq ınfeksıanyń 257 522 jaǵdaıy tirkeldi.