Qazaq ulttyq qyzdar pedagogıkalyq ýnıversıtetinde Jaratylystaný ınstıtýtynyń Bıologıa kabıneti jáne hımıa men geografıa baǵytyndaǵy dárisqanalardyń ashylý saltanaty ótti, dep habarlaıdy aqshamnews.kz
Geografıa baǵytyndaǵy dárisqanaǵa – Qazaqstan geografıa ǵylymynyń damýyna úles qosqan profesor Álim Birmaǵambetovtiń, al hımıa baǵytyndaǵy dárisqanaǵa – Qazaqstandaǵy hımıany oqytý ádistemesiniń damýyna eleýli úles qosqan pedagogıka ǵylymdarynyń kandıdaty, profesor Abdýlla Myrzabaıulynyń atyna berildi.
Bul qadam – bilim berý prosesin jańartý jáne zamanaýı talaptarǵa saı etip jetildirýge múmkindik beredi.
Ashylý rásimine Ýnıversıtettiń Dırektorlar keńesiniń tóraǵasy Omarhan Nurtaıuly, QyzPU Basqarma-Tóraǵasy Rektory Gúlmıra Qanaı, Almaty qalasyndaǵy hımıa-bıologıa baǵytyndaǵy Nazarbaev Zıatkerlik mektebiniń dırektory Maslıhat Zámirbekqyzy, pedagogıka ǵylymynyń kandıdaty, geografıa kafedrasynyń profesor mindetin atqarýshy Mamırova Qýlash Nurbergenqyzy jáne profesor Abdýlla Myrzabaıulynyń jubaıy Erkin Týrbekovna qatysyp, qyzyl lentasyn qıdy.
«Muǵalim balalarǵa dáris beretin bolǵandyqtan, onyń bilimi zor bolýy kerek. Búgingi tańda mektepterde tehnıkalyq jabdyqtaý joǵary deńgeıde. Stýdentterimiz sol jabdyqtarmen jumys isteı alýy tıis. Bilimdi muǵalimnen joǵary bilim alatyn bolsa, olardyń elimizdiń ekonomıkasyna qosar úlesi mol bolady. Mine, osynyń bárin eskerip, zerthanalardy barlyq pánderge qatysty jańartýdy maqsat etip qoıdyq. Men ýnıversıtet oqytýshylary men stýdentterine senemin. Osy salada olarǵa tıanaqty jumys tileımin», – dedi Dırektorlar keńesiniń tóraǵasy Omarhan Óksikbaev.
QyzPU-da ashylǵan zamanaýı bıologıa kabıneti – stýdentterdiń zertteý daǵdylaryn qalyptastyryp, olardy bıologıa, ekologıa, bıomedısına jáne basqa da ǵylym salalarynda kásibı maman retinde daıyndaýǵa múmkindik beredi. Bilim berý qyzmeti, tabıǵatty zertteý, ǵylymı dúnıetanymdy qalyptastyrý jáne bilim alýshylardyń zertteý daǵdylaryn damytý – bıologıa kabınetiniń negizgi baǵyttary. Bul fýnksıalardyń negizgi aspektilerine: praktıkalyq daǵdylardy damytý, ǵylymı ádistermen jumys isteý, zertteýlerdi, tájirıbeler men baqylaýlardy oryndaý, bıologıalyq prosesterdi modeldeý úshin sandyq mıkroskoptardy jáne kompúterlik baǵdarlamalardy qoldaný jatady.
«Búgin qarjylyq-ekonomıkalyq negizde jasaqtalǵan bıologıalyq bilim berý kabıneti ashylyp otyr. Bul kabınette stýdentterdiń bilim alýyna jáne ǵylymı-zertteý jumystaryn júrgizýine tolyq jaǵdaı jasalǵan. Atap aıtsaq, bilim berý baǵyttary boıynsha demonstrasıalyq materıaldar, túrli praktıkalyq jáne zerthanalyq sabaqtarǵa qajetti qural-jabdyqtarmen qamtamasyz etilgen. Sonymen qatar ǵylymı-zertteý jumystaryn júrgizýge de úlken múmkindik berilip otyr. Bıohımıalyq jáne medısınalyq baǵyttaǵy ǵylymı-zertteý jumystarynyń barlyǵy bolashaqta stýdentterdiń biliktiligin arttyrýǵa septigin tıgizedi», – dedi Jaratylystaný ınstıtýty, bıologıa kafedrasynyń baǵdarlama kóshbasshysy Asqar Maralovıch Kalekeshov.
Álim Birmaǵambetuly atyndaǵy dárisqana ǵalymnyń ǵylym men geografıa bilimin damytýdaǵy qajyrly eńbegin dáripteý maqsatynda ashyldy. Bul dárisqanada stýdentter geografıa salasyndaǵy bilimderin jetildirip, jańa zertteýlerge bet bura alady.
«Búgin bizdiń ınstıtýtymyzda eleýli ári qýanyshty kún bolyp otyr. Álim Birmaǵambetovtiń qurmetine geografıa ádistemelik kabıneti ashylyp, onyń eńbekteri men ǵylym jolyndaǵy jetistikteri, bilim alýshylarǵa kórsetken shapaǵaty arnaıy QR kod arqyly kabınetke ilinip, stýdentterimiz úshin úlken múmkindikter ashylyp otyr. Bul kabınet stýdentter úshin qutty uıaǵa aınalatynyna senimdimiz. Sebebi Álim Birmaǵambetov qazirgi tańǵa deıin bizdiń magıstranttar men doktoranttarymyzǵa ǵylymı ádistemelik eńbekterin usynyp, ustazdyq joldan áli de talmaı, uly tulǵa bolyp janymyzda júr. Álim Birmaǵambetovtiń eńbegi ýnıversıtetimiz úshin asa mańyzdy», – dedi Jaratylystaný ınstıtýtynyń dırektory Gaýhar Baıtasheva.
Sondaı-aq sharaǵa ǵalymnyń jaqyn týystary da qatysty. Ýnıversıtet basshylyǵyna alǵys bildirip, bolashaq geograf mamandarǵa sáttilik tiledi.
«Bul kabınettiń mańyzy óte zor. Ol kisiniń Qazaqstanǵa arnalǵan eńbekteri, túrli ǵylymı zertteý jumystary, mektepke arnalǵan oqý quraldary, oqýshylarǵa arnalǵan hrestomatıalary men ártúrli kitaptary stýdentterge úlken áserin tıgizedi dep oılaımyn. Óz tarapymnan ýnıversıtet basshylaryna jáne áriptesterime alǵysymdy bildiremin», – dedi Álim Birmaǵambetulynyń kelini, pedagogıka ǵylymynyń kandıdaty, geografıa kafedrasynyń profesor mindetin atqarýshy Mamırova Qýlash Nurbergenqyzy.
Abdýlla Myrzabaıuly atyndaǵy hımıa dárisqanasy ǵalymnyń Qazaqstandaǵy bilim salasyndaǵy eńbek etý joly men qyzmetin, hımıany oqytý ádistemesiniń damýyndaǵy eleýli eńbekterin dáripteý maqsatynda ashyldy. Dárisqana stýdentterdiń hımıa pánin tereńirek meńgerýine jáne tájirıbelik bilimderin jetildirýine múmkindik beredi. Zamanaýı qural-jabdyqtarmen qamtylyp, stýdentterdiń praktıkalyq daǵdylaryn damytýǵa baǵyttalǵan.
«Abdýlla Myrzabaıuly tek ustaz emes, uly tulǵa dep ataǵym keledi. Ǵalymnyń eńbegi máńgilik, sebebi bizdiń ýnıversıtetimizde 47 jyl eńbek etken aǵaıymyz jıyrmadan asa ádistemelik qural jazyp, stýdentterimizge hımıany ıgerýdiń naqty jolyn kórsetip, bilim alýshylarǵa mol mura qaldyrdy. Abdýlla Myrzabaıulynyń eńbekteri ýnıversıtetimizdiń kitaphanasynda saqtalyp, stýdentterimizdiń zertteý jumystarynda qoldanylýda», – dedi Jaratylystaný ınstıtýtynyń dırektory Gaýhar Baıtasheva.
QyzPU Jaratylystaný ınstıtýtynyń bıologıa kabıneti jáne hımıa men geografıa baǵytyndaǵy dárisqanalardyń ashylýy stýdentterdiń sapaly bilim alýyna, ǵylymı-zertteý daǵdylaryn qalyptastyrýyna jáne kásibı quzyretterin arttyrýyna zor yqpal etpek.