2025 jylǵy 17-20 aqpan aralyǵynda Almaty qalasynyń Balýan Sholaq atyndaǵy sport saraıynda Uly Jeńistiń 80 jyldyǵyna arnalǵan Ulttyq qaýipsizdik komıteti Tóraǵasynyń kýbogy úshin voıleıboldan ótken týrnırda Shekara akademıasynyń qurama komandasy júzden júırik, myńnan tulpar atandy, dep habarlaıdy aqshamnews.kz
Úsh kúnge sozylǵan jarys tartysqa toly boldy. Barlyq komandalar qyzý daıyndyqpen kelgen. Ulttyq qaýipsizdik komıteti uıymdastyrǵan saıysqa bas-aıaǵy 24 komanda qatysyp, 200-den astam sportshy óner kórsetti.
Sporttyq saıystyń ashylý saltanatynda elimizdiń Memlekettik Gımni oınalyp, barsha qatysýshylar Memlekettik Týǵa qarap sap túzedi. Qazylar úshin qyzýqandy jankúıerlerdiń qıqýyna ulasqan saıysta jeńimpazdardy anyqtaý ońaı bolmady. Barlyq komandalar kileń myqty oıynshylaryn iriktep ákelgeni sonshalyq, ár komanda oıynshylary namysty qoldan bermeýge tyrysyp baqty. -Áıtse de, osy joly da birinshi oryndy alamyz dep kelgen Pavlodar oblysyndaǵy áriptesterimizdiń saly sýǵa ketti. Bul jolǵy oıynda shekarashylar basym túsip, chempıon atanyp, jeńis tuǵyrynan kórindi.
Ásirese, D.Bekbaevtyń syzyq boıynda turyp urǵan dobyna qarsylas komandalar áreń tótep berip, onyń ár urǵan doby komandasyna upaı bolyp jınaldy. Al aǵaıyndy Asqatovtardyń tor setkanyń mańynda turyp kezek-kezek urǵan doptary kózdegen jerlerine dál túsip komandanyń upaıyn eseleı tústi. Mundaı ádemi kórinisti A.Prıshepa men I.Bysko da adam qyzyǵatyndaı soqqylar jasap zal toly kórermenderdiń kóńiline qýanysh uıalatty. Qarsylastar tarapynan urǵan dopty alańǵa túsirmeýge tyrysqan S.Abdınýrov pen A.Sıdorenko reti kelgende shabýylǵa shyǵyp kúshti oıyn órnekterin kórsetti. Komanda jetekshisi M.Ramazanov ár oıyn barysyn qadaǵalap, kásibı jetekshilik ete bildi.
Komandalar baq synaǵan saıysta osaly bolmady. Ár óńirdegi departamentterden iriktelgen komanda oıynshylary saıysty tartysty ótkizip, oıynnyń kórkin qyzdyra tústi. Oıyn kezinde ala dopty alaqanynda oınatatyn shekarashylar talaı baıraqty básekede baq synap júrgen kil myqtylardan quralǵan bolatyn. Olardyń quramynda: M.Ramazanov, A.Sıdorenko, S.Abdınýrov, V.Isaeev, B.Malkaıdarov, A.Asqatov, D.Asqatov, A.Prıshepa, D.Bekbaev, I.Bysko bar. Atalǵan oıynshylardyń barlyǵy sport dese ishken asyn jerge qoıatyn myqtylar. Bir sózben aıtqanda kásibı sport sheberleri.
«Balasy báıegege shapsa, anasy úıde otyryp taqymyn qysady»,- demekshi, áriptesteriniń ár qımylyn jiti baqylap otyrǵan Shekara akademıasynyń profesorlyq-oqytýshylyq quramy men 3-oqý dıvızıon kýrsanttary oıyn bitkenshe tikesinen tik turyp, shapalaqty uryp turyp qoldaý kórsetti. Óz kezeginde Shekara akademıasynyń ánuranyn shyrqap, oıynshylarǵa rýhtyq qoldaý kórsete bildi.
Qalaı aıtsaq ta, ózara baq synasqan sport sańlaqtarynyń jarysy joǵary deńgeıde ótti. İs-sharanyń basty maqsaty da osy bolǵan. Salaýatty ómir saltyn nasıhattap, ár oblysta ornalasqan Ulttyq qaýipsizdik komıtetiniń departament qyzmetkerleriniń sheberligin shyńdaý edi.
Memleket basshysy Qasym-Jomart Toqaev buqaralyq sportty damytýǵa erekshe kóńil bólýde. Búgingi 3 kúnge sozylǵan tartysty saıys sonyń aıqyn dáleli. Ulttyq qaýipsizdik komıtetiniń ujymy uıymdastyrǵan voleıbol jarysynan Shekara akademıasynyń qurama komandasy 1-oryn, Soltústik Qazaqstan oblysynan at terletip kelgen komanda 2-oryn, ózderine qatty senim artyp kelgen Pavlodar oblysynan kelgen komanda oıynshylary 3-orynǵa turaqtady.
Jeńis bar jerde jeńilis bar demekshi, jeńilistiń ashshy dámin tatqan komandalar da boldy. Olardyń jaqsy oıyn órnekterin kórsetken oıynshylaryna UQK Tóraǵasynyń orynbasary general-maıor A.Naımantaev ártúrli nomınasıa boıynsha maqtaý gramotalar men syılyqtardy saltanatty túrde tabystady.