Almatyda oqýshy ornynyń tapshylyǵyn azaıtyp, bilim berý mekemelerin jańǵyrtýǵa baǵyttalǵan «Keleshek mektepteri» men «1300 mektepti ońaltý» ulttyq jobasy júıeli túrde iske asyp jatyr. Bıyl 1 qyrkúıekte qalada 12 jańa mektep ashylmaq. Óńirlik komýnıkasıalar qyzmetinde ótken baspasóz konferensıasynda Almaty qalasy Bilim basqarmasynyń basshysy Saıran Saıfedenov osylaı dep málimdedi.
Jalpy, «Keleshek mektepteri» jobasy aıasynda 34,8 myń oqýshyǵa arnalǵan 21 mektep salynyp jatyr. Onyń ishinde 13 mektep «Samruk-Kazyna Construction» kompanıasynyń qatysýymen qolǵa alynǵan. Byltyr bir mektep paıdalanýǵa berilse, jańa oqý jylynyń alǵashqy kúni taǵy 7 mektep esigin ashady. Budan bólek, tamyz aıynyń sońyna deıin taǵy 5 mekteptiń qurylysy aıaqtalyp, qyrkúıekte ashylmaq.
Qosymsha 8 mektep jeke ınvestorlardyń qatysýymen «satyp alý» mehanızmi arqyly salyna bastady. Sonyń ishinde eki mektep bıyl qyrkúıekte iske qosylady. Taǵy eki mektep 2025 jyldyń jeltoqsanynda, qalǵan tórteýi jyl sońyna deıin ashylmaq.
«1300 mektepti ońaltý» jobasy aıasynda 2025–2027 jyldarǵa arnalǵan Almatydaǵy 31 bilim berý mekemesiniń tizimi jasaqtaldy. 2025 jyly 15 mektepte, 2026 jyly – 9, 2027 jyly – 7 mektepte osyndaı jumys josparlanǵan. Bes nysanda qurylys pen qaıta jańartý jumysy júrip jatyr. Sonymen qatar, jergilikti búdjet esebinen «Zerdeli» shaǵynaýdanynda 550 oryndyq mektep salyna bastady. Naýryzbaı aýdanynda 1200 oryndyq jańa mektep satyp alý josparlanǵan, ol 2025 jyldyń sońyna deıin qoldanysqa berilmek.
Qalada qosymsha 3 myńnan astam oqýshy orny qurylatyn 13 mektep pen 8 qosymsha ǵımaratty seısmıkalyq kúsheıtý jáne qaıta qurý jumystary belsendi júrip jatyr. Keıbir nysandar tolyq jańaryp úlgerdi. Oqý jyly bastalǵanǵa deıin taǵy 4 mektep paıdalanýǵa berilip, jyl sońyna deıin qosymsha 8 mektep aıaqtalady. Qalǵan 8 nysannyń jumysy 2026 jyly jalǵasady.
Sonymen qatar 8 balabaqsha men Mashına jasaý jáne telekomýnıkasıalar koleji kúrdeli jóndeýden ótip jatyr. Aǵymdaǵy jóndeý jumystary 188 mektepte, 48 balabaqshada, 15 kolejde, 7 ınternatta jáne qosymsha bilim beretin 4 mekemede atqarylyp jatyr. Bul maqsatqa 1,8 mlrd teńge bólingen.
Bilim berý nysandaryn jylytý maýsymyna daıarlaý jumysy da aıaqtalyp qalyd. 196 balabaqshanyń 188-i daıyndyq aktisin aldy, qalǵany jóndelip jatyr. 216 mekteptiń 203-i daıyndyqtan ótse, qalǵany jaqyn arada aıaqtalady. 20 kolejdiń 19-y daıyn, qosymsha bilim beretin 19 mekemeniń 17-si qysqa tolyq ázir. Barlyq nysan tamyz aıynyń sońyna deıin jylytý maýsymyna daıyn bolmaq.
Osylaısha, Almaty sapaly da qaýipsiz bilim berý ortasyn qalyptastyryp jatyr. Jańa mektepterdiń ashylýy men qoldanystaǵy mekemelerdiń jańǵyrtylýy qaladaǵy myńdaǵan oqýshyǵa qolaıly jaǵdaı jasamaq.