Almaty – elimizdiń eń kórikti, tabıǵaty ásem qalalarynyń biri. Taý men ózenniń arasyndaǵy bul megapolıske tek qazaqstandyqtar ǵana emes, sheteldik týrıser de jıi keledi. Sondyqtan da qalanyń árbir buryshynyń taza ári jaıly bolýy – barshamyzdyń ortaq mindetimiz. Osy oraıda el kóleminde jarıalanǵan «Taza Qazaqstan» aksıasy aıasynda Saıran kóliniń jaǵalaýynda erekshe is-shara ótti.
Bul ıgi bastamanyń basynda – 20 jastaǵy jas bloger Dýlat Nábıev tur. Ol «Vırýs» atty áleýmettik jobasyn qolǵa alyp, sonyń aıasynda «90 kún – taza qala úshin» atty ekochellendjdi bastaǵan bolatyn. Negizgi maqsaty – jastardy áleýmettik jeli arqyly ekologıalyq mádenıetke baýlý, qala turǵyndaryn tabıǵatty aıalaýǵa úndeý.
Dýlattyń aıtýynsha, bastapqyda ol áleýmettik jelilerde ýaqytyn bosqa ótkizip júrgenin túsinip, qoǵamǵa paıdaly kontent jasaýdy qolǵa alǵan.
«Alǵashqy kúnderi bizde tájirıbe de, qajetti quraldar da bolǵan joq. Soǵan qaramastan Almaty kóshelerinen qoqys jınaýdy bastadym. Alǵashqy aptada kún saıyn 10 qaptan asa qoqys shyǵardyq. Áleýmettik jelide jarıalaǵan soń, halyq qoldaý bildirip, bizge qosyla bastady», – deıdi ol.
Osylaısha chellendjdiń 11-shi kúninen bastap Saıran kóliniń aýmaǵyn tazalaý bastaldy. Óıtkeni bul jerde halyq kóp jınalatynyna qaramastan, qoqys ta jıi qalatyn. Alǵashqyda alty-aq eriktimen jumys istegen jastar birte-birte otyzdan astam belsendilerdiń basyn qosty. Qazir Dýlattyń bastamasyna tek Almaty jastary ǵana emes, basqa óńirlerdiń de belsendileri qosyldy. Shymkentte eki júzden astam jas, Jarkentte 150-ge jýyq, Jetisaıda 100-ge tarta erikti jobaǵa atsalysqan. Jalpy tórt qalada jınalǵan eriktilerdiń sany 500-ge jetken.
– Bizdiń eń basty maqsatymyz – 90 kún ishinde Almatyny ǵana emes, elimizdiń ózge qalalaryn da tazalyqqa shaqyrý. Bul tek qoqys jınaý emes, halyqtyń ekologıalyq mádenıetin qalyptastyrý. Qala turǵyndaryna úlgi bolyp, tabıǵatty qorǵaýǵa degen súıispenshiligin oıatqymyz keledi», – deıdi Dýlat Nábıev.
Jastardyń bul ıgi isine kásipkerler de, memlekettik organdar da qoldaý bildirip otyr. Máselen, otandyq kompanıalar arnaıy qaptar, qolǵaptarmen qamtamasyz etip, tipti tehnıka túrinde kómek kórsetken. Keıbir kásipkerler komandaǵa qajetti qural-jabdyqtar syılasa, Almaty qalasy ákimdigi men Jastar saıasaty basqarmasy uıymdastyrýshylyq turǵyda qoldaý tanytqan.
Sonymen birge chellendjdiń áleýmettik jelilerdegi paraqshalary arqyly halyq ta óz úlesin qosyp, eriktilerdiń tamaǵyna, jol shyǵyndaryna qarjylaı kómek berip otyr.
«Taza Qazaqstan» aksıasy aıasynda ótken Saırandaǵy sharaǵa jınalǵan qoqystyń kólemi júzdegen qapqa jetti. Bul – tek jastardyń ǵana emes, barshamyzdyń oılanatyn máselesi. Qala tazalyǵy ár turǵynnyń jaýapkershiligine tikeleı baılanysty.
Jas blogerdiń bastamasy qoǵamda úlken serpilis týdyryp otyr. Ekochellendjge qatysqan árbir jas tabıǵatty qorǵaýdyń mańyzyn túsinip, ózgelerge úlgi bolýda.
Almatynyń ásem tabıǵatyn saqtaý – búgingi urpaqtyń ǵana emes, keleshek býynnyń da ıgiligi. Sondyqtan qala turǵyndary tazalyqty saqtap, ekologıalyq mádenıetti qalyptastyrýǵa birge úles qosqany abzal.