Oǵan «Tótenshe jaǵdaıdaǵy erligi úshin» tósbelgisi tabystaldy.
Almatyda bıiktikten qulaı jazdaǵan balany qutqarǵan stýdent marapattaldy, dep habarlaıdy Almaty-akshamy.kz Tótenshe jaǵdaılar departamentiniń baspasóz qyzmetine silteme jasap.
Tótenshe jaǵdaılar departamentiniń málimetinshe, mınıstr Iýrıı Ilınniń buıryǵy boıynsha Almatyda Abaı atyndaǵy pedagogıkalyq ýnıversıtettiń dene shynyqtyrý fakúltetiniń 18 jastaǵy stýdenti Erasyl Mahmud marapattalǵan. Ol balany aman alyp qalǵany úshin «Tótenshe jaǵdaıdaǵy erligi úshin» tósbelgisimen marapattaldy.
«Almatyda saltanatty túrde ujymnyń qatysýymen mınıstrdiń atynan marapatty Almaty qalasy Tótenshe jaǵdaılar departamentiniń basshysy Rýslan Qasybaev tabys etti. Rýslan Qasybaev Erasyldyń ata-anasyna ulyna laıyqty tárbıe bergeni úshin alǵysyn bildirdi. Ol Qazaqstanda osyndaı balalar barda aǵa býyn elimizdiń bolashaǵyna senimdi bola alatynyn aıtty», - dedi Tótenshe jaǵdaılar mınıstrligi ókilderi.
21 shilde kúni Mahmud Erasyl kóp qabatty úıdiń jetinshi qabatyndaǵy baspaldaqtyń qorshaýynda qysylyp qalǵan balany ustap, aman alyp qalǵan.