Alyp shahardyń tazalyǵy - kún tártibinde turǵan negizgi jumystardyń biri.
Búginde qalanyń barlyq aýdandarynda tazalyq jumystary qarqyndy júrip jatyr, dep habarlaıdy Almaty-akshamy.kz
Almaty qalasynyń ákimdigi avtomobıl joldaryn, trotýarlar men aryq jelilerin sanıtarlyq tazalaý jumystarynyń tıimdiligin arttyrý boıynsha sharalar qabyldaýda.
Basylym tilshileri keshe Medeý aýdanyndaǵy júrgizilip jatqan tazalyq jumystaryn baqylap qaıtty.
«Medeý aýdany boıynsha tazalyqqa jaýap beretin 5 brıgada bar. Ózderińiz de baıqap otyrsyzdar, qala kóshelerinde jasyl jelek jaıqalǵanymen, aptap ystyq saldarynan japyraqtar sarǵaıyp túsip jatyr. Mine, solardy tazalap jatyrmyz. Búgin jospar boıynsha Dostyq dańǵyly men ál-Farabı dańǵyldarynyń boıyn, Shevchenko, Qonaev jáne Maqataev kóshelerine deıin jol jıegin, sýaǵarlardy tazartamyz. Aýdanda tazalyq jumystary táýlik boıy júrgiziledi. Negizgi jumystardyń basym bóligi kúndizgi ýaqytta júzege asyp, túngi ýaqytta arnaıy kólikpen kezekshilik uıymdastyrylady», – deıdi brıgada jetekshisi «Almaty tazalyq» MKK-nyń Medeý aýdany boıynsha bólim basshysy Áset Tólegenov.
Aǵashtardan túsken japyraqtardy bilek sybana kirisip tazalap jatqan jumysshylardyń arasynda kózimizge túsken aǵamyzdy sózge tarttyq.
«Jasym 66-da. Esimim – Dónesbaı. Biraq, meni barlyǵy laqap atymmen «Denıs» dep ataıdy. Óıtkeni, kóbi orys tildi bolǵan soń tilderi kelmeıdi. «Almaty tazalyqta» jumys istep júrgenime 10 jyldan asty. «Eki qolǵa bir kúrek» ustaıtyndaı shamam bar. Sondyqtan úıde bos jata almaımyn. Jumys muryn qanaıtyndaı aýyr emes. Mindetimiz – jaıaý júrginshiler jolyn tazartyp, qoqysty jınaý. Bizdiń qala turǵyndaryna "qoǵamdyq oryndardy lastamańyzdar, ásirese, aıaldamalarda qoqysty beı-bereket shashpaı, arnaıy qoqys jáshikterine salyńyzdar" dep ótinish aıtamyz. Al biz ózimizge tapsyrylǵan mindetti tıisti deńgeıde oryndap júrmiz dep oılaımyz. Onyń dáleli sol - qala turǵyndary jıi alǵys aıtyp jatady», – deıdi Dónesbaı Álbetov.
Qala ákimdigi baspasóz qyzmetiniń habarlaýynsha, búgingi tańda megapolıste qyzmet kórsetiletin joldardyń jalpy aýdany 25 mln sharshy metrden astam aýmaqty quraıdy. Megapolıstiń 2318 kóshesinde tazalyq jumystary kún saıyn júrgiziledi. Onyń ishinde 2 706,5 shaqyrym jol, 1 303,8 shaqyrym trotýar jáne 1167,4 shaqyrym aryq jelileri bar. Sondaı-aq, qalanyń kóshe-jol jelisin qadaǵalap, tazalyǵyn baqylap otyratyn «Almaty tazalyq» MKK-men birge, 14 merdigerlik uıym jumys isteıdi.
Sý basýdyń aldyn alý maqsatynda da júrgizilip jatqan sharýa kóp. 60-tan astam arnaıy tehnıka men merdigerlik uıymdardyń 300 jol jumysshysy aryq jelileri men aryq ótkelderin tazartýmen aınalysady.
Magıstraldyq kóshelerdi jýý táýligine eki ret uıymdastyrylady. Al aýdandyq mańyzy bar kóshelerdi jáne jalpy paıdalaný oryndaryn jýý – aýdan ákimdikteri bekitken tehnıkalyq erekshelikke sáıkes kún saıyn júrgiziledi. Joldardy jýý jumystary jaıaý júrginshilerdiń júrip-turýyna kedergi keltirmeıdi. Iaǵnı júrginshige sý shashyratpaý, sondaı-aq avtomobıl dóńgelekterimen ylǵaldanǵan smetanyń taralýyn azaıtý maqsatynda jumystar negizinen túngi ýaqyttarda júzege asyrylady.
Joldyń júrý bóligin sýarý-jýý mashınalarymen jýǵannan keıin, jol jıegine shegelengen qoqysty jol jumysshylary jınap, qoqys úıindisine shyǵarady. Sonymen qatar, qoqys jınaý úshin soqaly shetka mehanızmderi qoldanylady. Shańdy azaıtý úshin joldarǵa aldyn ala sý sebiledi. Mamandardyń aıtýynsha, joldar men trotýarlardy jýýǵa táýligine 5 myń tekshe metr sý jumsalady.
Jumysshylar tań atysymen óz sharýalaryna kirisedi. «Almaty tazalyq» MKK jaz maýsymynda kóshelerdi tazalaý, abattandyrý, jol boıyn jýý, qoqystardy shyǵarý sıaqty jumystardy atqarady. Atap aıtqanda, aptap ystyq kezinde jol jıekterine sý shashý jumystary júrgiziledi. Ol joldaǵy shańnyń azaıýyna sep. Jalpy, jaz ýaqytynda kóshelerdi tazalaý jumystaryna qalanyń barlyq aýdanynda úzdiksiz tazalyq jumystary júrgiziledi. Jumysshylar jýý qurylǵylary, jol sypyrýǵa, sý shashýǵa arnalǵan tehnıkalar, júk tıegishter men júk tasymaldaǵyshtarmen qamtamasyz etilgen. Komýnaldyq qyzmet ókilderi úshin jumys kúni tańǵy saǵat 6-dan bastalady.
Kún saıyn qala kóshelerinde 866 arnaıy tehnıka (sonyń ishinde «Almaty tazalyq» – 609 tehnıka) jumys isteep, 1413 jol jumysshysy kúshimen 90 tonnadan astam qoqys shyǵarylady.