Óńirlerde ınfeksıa juqtyrý kórsetkishi artyp keledi.
Aýrýhanaǵa jatqyzý kórsetkishi 50 adamnan asqan kezde nysandarda Ashyq qosymshasy mindetti túrde paıdalanylady, dep habarlaıdy Almaty-akshamy.kz
Úkimet otyrysynda Densaýlyq saqtaý mınıstri Ajar Ǵınıat Ashyq qosymshasy qandaı jaǵdaıda engiziletinin naqtylap aıtty.
Vedomstvoaralyq komısıanyń sońǵy sheshimine sáıkes, «jasyl» jáne «sary» aımaqta eshqandaı shekteý sharalary joq. Biraq sanıtarlyq erejeler qatań saqtalýy shart. Qoǵamdyq oryndarda dezınfeksıa jasalady. Betperde kıýge usynys jasalǵan. Al «qyzyl» aımaqta shekteý sharalary densaýlyq saqtaý júıesiniń júktemesine qaraı eki kezeńmen qabyldanady.
«Birinshi kezeńde R 1-den artyq bolǵanda, ıaǵnı, aýrýdyń taralýy kúsheıgen kezde jáne 100 myń turǵynǵa shaqqanda aýrýhanaǵa jatqyzý kórsetkishi 25-50 naýqasqa deıin bolǵan kezde, bıznes shekteýsiz jumys isteıdi. Biraq jabyq úı-jaılarda jáne kóliktiń barlyq túrinde betperde kıý mindetti bolady. Ekinshi kezeńde R-ǵa qaramastan, aýrýhanaǵa jatqyzý kórsetkishi 50 adamnan asqan kezde nysandarda Ashyq qosymshasy mindetti túrde paıdalanylady», - dedi Ǵınıat.
Budan bólek, kópshilik sharalar men bıznes nysandarǵa kirý jaǵynan 50 paıyzdyq shekteý qoıylady. Bilim berý uıymdarynda qosymsha shekteýler engiziledi. Barlyq uıym qyzmetkerleriniń 30 paıyzy qashyqtan jumys isteýge aýysady.
Aıta ketetin jaıt, qazirgi kezde Nur-Sultan qalasy «sary» aımaqta tur, qalǵandary «jasyl» aımaqta. Degenmen, óńirlerde ınfeksıanyń juqtyrý kórsetkishi artyp keledi. Máselen, sońǵy eki aptanyń ishinde Aqtóbe, Batys Qazaqstan, Qaraǵandy, Pavlodar men Aqmola oblystarynda vırýs juqtyrǵandardyń sany 6 esege ósken.