Almatyda stýdentter arasyndaǵy eń tanymal ALMA CUP 2025 sporttyq týrnıri aıasynda basketboldan fınaldyq oıyndar ótti. Týrnır Almaty qalasy Jastar saıasaty basqarmasynyń qoldaýymen uıymdastyryldy.
ALMA CUP 2025 – jastar arasynda sport mádenıetin damytýǵa, fızıkalyq daıyndyq deńgeıin arttyrýǵa jáne komandalyq sport túrlerin, sonyń ishinde mını-fýtbol, basketbol, voleıbol men kıbersportty nasıhattaýǵa baǵyttalǵan áleýmettik joba. Týrnırdiń júlde qory 4 800 000 teńgeni quraıdy, onyń ishinde 1 600 000 teńge basketbolǵa (800 000 teńge – erler komandalaryna, 800 000 teńge – áıelder komandalaryna).
Aıta keteıik, ALMA CUP 2025 jobasy aıasynda, 1-2 naýryz kıbersporttan týrnır ótedi. Al, mını-fýtbol men voleıbol týrnırlerin sáýir aıynda ótkizý josparlanýda jáne 31 naýryzǵa deıin ótinim qabyldaý jalǵasady.
Basketbol týrnırine Almatynyń 30-dan astam oqý ornynan 34 komanda qatysty: 26 erler jáne 8 áıelder komandasy. Birneshe aı boıy stýdentter joǵary deńgeıdegi daıyndyqtaryn, sporttyq ynta-jigerlerin kórsete otyryp, qaladaǵy eń iri stýdenttik sport jobasynda jeńiske jetýge umtyldy.
Sheshýshi oıyndar nátıjesinde jeńimpazdar kelesideı anyqtaldy:
Erler komandasy arasynda jeńimpazdar tómendegideı anyqtaldy:
I oryn – QazSTA (Qazaq sport jáne týrızm akademıasy)
II oryn – HATÝ (Halyqaralyq aqparattyq tehnologıalar ýnıversıteti)
III oryn - «Turan» ýnıversıteti
Áıelder kategorıasy boıynsha:
I oryn – QazSTA (Qazaq sport jáne týrızm akademıasy)
II oryn – QazUÝ (Qazaq ulttyq ýnıversıteti)
III oryn – QyzPÝ (Qazaq ulttyq qyzdar pedagogıkalyq ýnıversıteti)
Jeńimpazdar men júldegerler kýboktarmen, medaldarmen, maqtaý qaǵazdarymen jáne aqshalaı syılyqtarmen marapattaldy.
«Týrnır óte joǵary deńgeıde ótti! Barlyq komandalar myqty daıyndalǵan, oıyndar qyzý tartysqa toly boldy. Mundaı jarystar sportshylar úshin úlken motıvasıa beredi. ALMA CUP bizge tek jeńiske degen qulshynys emes, jańa dostar, erekshe emosıalar syılady. Uıymdastyrýshylarǵa osyndaı keremet múmkindik úshin úlken alǵys aıtamyn! Bizdiń komanda úshin bul úlken jetistik, ári qaraı da bıik belesterdi baǵyndyrýǵa daıynbyz!», - dedi ALMA CUP 2025 týrnıriniń jeńimpazy, QazSTA stýdenti Mustajapqyzy Gúljanar.
Almaty qalasy Jastar saıasaty basqarmasynyń málimetinshe, 2025 jyly jastardy jan-jaqty qoldaý boıynsha 56 jobany júzege asyrýǵa josparlanǵan. Solardyń ishinde birneshe jyldyń ishinde qalamyzdyń stýdentteri arasynda suranysqa ıe bolǵan joba bul - ALMA CUP.
Uıymdastyrýshylar týrnırdiń barlyq qatysýshylaryna, jattyqtyrýshylarǵa, jankúıerlerge men seriktesterge stýdenttik sportty damytýǵa qosqan úlesteri úshin alǵys bildiredi.