Almatyda Ulttyq ulannyń 5571 áskerı bóliminiń áskerı qyzmetshileri men Ardagerler keńesi tyl ardageri, otstavkadaǵy maıor Ǵalymjan Bakeshev aqsaqalǵa sálem bere bardy.
Soǵystyń «balalary» – bul balalyq shaǵy Uly Otan soǵysy jyldarymen tuspa-tus kelgen adamdar. Olar qolyna qarý ustap maıdanda soǵyspasa da, taǵdyry soǵyspen tyǵyz baılanysty boldy. Bul balalar ashtyqty, qarsha boraǵan bombalardyń qorqynyshyn, úreıin bastan ótkerdi. Jaqyndaryn soǵys jalmady. Bala da bolsa Jeńisti jaqyndatamyz dep, buqanasy bekimeı jatyp tylda aýyr eńbek etip, qıynshylyqmen ósti.
Soǵys bastalǵanda Ǵalymjan ata nebári alty jasta edi. Onyń da balalyq shaǵyn soǵys urlaǵan bolatyn. Ol da eńbekke erte aralasyp, aýyldaǵy er-azamattardyń ornyn basty, analarymen birge tylda eńbek ete júrip, Jeńiske úles qosty.
Qazir soǵys jylǵy balalar tyl ardagerlerine teńestirilgen. Óıtkeni olardyń kóbi kishkentaı jasynan maıdanǵa ketken eresekterdiń ornyn basyp, zaýyttarda, kolhozdarda jumys istedi, sarbazdarǵa jyly kıim toqydy. Ǵalymjan aqsaqalǵa da osy mártebe berilgen. Sonymen qatar, Ǵalymjan Júnisuly – Ulttyq ulannyń qart ardagerleriniń biri. Ol 1960 jyldan bastap KSRO-nyń İshki áskerinde ár túrli qyzmetterde bolǵan. İshki ásker basqarmasynda saıasat bóliminiń nusqaýshysy laýazymynda zeınetke shyqqan.
Búginde Ulttyq ulanda «Jeńiske 100 kún qalǵanda» aksıasy júrip jatyr. Osy is-shara aıasynda soǵys jáne tyl ardagerleri úshin kóptegen ıgi ister atqarylyp jatyr. Ulandyqtar Ǵalymjan ata men Qonyskúl apaǵa arnaıy ákelgen syılyqtaryn tabystap, syrnaılarymen án salyp, qarttarǵa kóterińki kóńil kúı syılap ketti.