Almatyda erekshe áleýmettik qyzmetterge muqtaj balalarǵa arnalǵan №2 qoldaý kórsetý ortalyǵy ǵımaratynyń qaıta jańǵyrtýyna daıyndyq bastaldy. Jóndeý jumysy kezeńinde tárbıelenýshiler ýaqytsha №1 arnaıy mektep-ınternatyna kóshirildi. Bul týraly buǵan deıin Almaty qalasy ákiminiń orynbasary Azamat Qaldybekov Óńirlik komýnıkasıalar qyzmetinde ótken baspasóz konferensıasynda habarlaǵan bolatyn.
Qazirgi tańda ortalyqta 100 bala tárbıelenýde, olardyń ishinde 13-i mektepke deıingi jasta, 87-si mektep oqýshylary.
Buǵan deıin Memleket basshysynyń tapsyrmasy aıasynda ortalyq ǵımaraty tolyq jóndeýden ótetini habarlanǵan edi. «Integra» JSHS áleýmettik jaýapkershilik aıasynda jóndeý jumystaryn óz esebinen júrgizýge mindetteme alyp, balalar kóshken soń qurylys-montaj jumystaryna dereý kirisýge daıyn ekenin málimdedi.
Almaty qalalyq Bilim basqarmasynyń basshysy Saıran Saıfedenovtiń aıtýynsha, tárbıelenýshilerdi ornalastyrý máselesi erekshe baqylaýda.
«Qazirgi ýaqytta jóndeýdiń jobalyq-smetalyq qujattamasy ázirlenip jatyr. Onyń aıasynda negizgi ǵımaratty qaıta jańartý jáne eski sharýashylyq qurylystaryn ishinara buzý qarastyrylǵan. Sondaı-aq jańa ákimshilik korpýs salý josparlanǵan», — dedi ol.
Saıran Saıfedenov atap ótkendeı, balalardy ýaqytsha kóshirý máselesi sheshilgen.
«Balalar ýaqytsha ornalasqan №1 arnaıy mektep-ınternaty da Bilim basqarmasynyń qaramaǵynda. Eki apta buryn munda «Januıa» mamandandyrylǵan úıiniń 90-nan astam tárbıelenýshisi turǵan bolatyn. Balalardyń ıeliginde 1100 sharshy metrden astam aýmaq bar — bul 18 bólme, onda aǵymdaǵy jóndeý júrgizilgen. Apta sońyna qaraı ǵımarat tolyq bosatylǵannan keıin merdiger uıym qaıta jańǵyrtý jumysyna kirisedi», — dep naqtylady ol.
Erekshe áleýmettik qyzmetterge muqtaj balalarǵa arnalǵan №2 qoldaý kórsetý ortalyǵynyń dırektory Juldyz Meńlibekova kóshý úderisi uıymdasqan túrde ótkenin atap ótti.
«Bizdiń ortalyq ýaqytsha qaıta jańǵyrtýǵa jabyldy. Ol 1962 jyly salynǵan, sondyqtan jóndeý jumysy qajet edi. Qazir biz Toraıǵyrov kóshesindegi ǵımaratqa kóshtik. Balalar rıza: bólmeler keń, jaryq, barlyq jaǵdaı jasalǵan. Bizge osyndaı jaqsy ǵımarat usynǵany úshin Bilim basqarmasyna jáne Almaty ákimdigine alǵys bildiremiz», — dedi ol.
«Mundaǵy jaǵdaı unaıdy: bólmeler jaqsy, jaıly. Biraq báribir óz úıimizge oralýdy kútemiz. Keıbirimiz ol jerde on jyldan beri turamyz, men ózim tórt jyldan beri. Sol sebepti jóndeýdiń aıaqtalýyn asyǵa kútemiz», — dep bólisti tárbıelenýshilerdiń biri.
Búginde Almatyda erekshe bilim berý qajettiligi bar balalarǵa arnalǵan segiz arnaıy mektep-ınternat jumys isteıdi, onda 2 668 oqýshy bilim alady. Onyń ishinde 1 794 bala ınternatta turady, al 874-i úıde oqıdy. Budan bólek, ómirinde qıyndyq bolyp jatqan kámeletke tolmaǵandarǵa kómek kórsetetin tórt uıym bar. Bul mekemelerde 446 bala tárbıelenip jatyr.
Aıta keteıik, bıylǵy 20 qyrkúıekte Almatyda qurylys kompanıalarynyń biri 6 mlrd teńge qarajat esebinen salǵan jańa «Januıa» mamandandyrylǵan kesheni ashyldy. Bul joba áleýmettik máselelerdi sheshýdegi memleket pen bıznestiń tıimdi seriktestiginiń úlgisi boldy.