Almaty ákimi Darhan Satybaldy «Qazaqstan – Shveısarıa» parlamenttik dostyq tobynyń teń tóraǵasy, kantondar keńesiniń depýtaty Iozef Dıtlı bastaǵan Shveısarıa Parlamenti depýtattary delegasıasymen kezdesti.
Delegasıa quramynda kantondar keńesiniń burynǵy tóraǵasy Fıllıp Lombardı, kantondar keńesiniń depýtaty Marko Keza, ulttyq keńes depýtaty Erık Nýsbaýmer jáne Shveısarıa Konfederasıasy Parlamentiniń basqa da ókilderi boldy.
Darhan Satybaldy atap ótkendeı, Almaty – eldiń eń iri qarjy jáne iskerlik ortalyǵy. Munda Qazaqstandaǵy bank aktıvteriniń 60 paıyzdan astamy men saqtandyrý naryǵynyń shamamen 70 paıyzy shoǵyrlanǵan. Qalanyń ekonomıkasynyń negizin qyzmet kórsetý men saýda salasy quraıdy, al shaǵyn jáne orta bıznes halyqty jumyspen qamtýdyń jáne tabys ósiminiń negizgi kózi bolyp otyr.
Sondaı-aq ákimniń aıtýynsha, 2025 jyldyń qańtar–tamyz aılaryndaǵy qorytyndy boıynsha Almaty men Shveısarıa arasyndaǵy taýar aınalymy 303 myń AQSH dollar boldy.
Kezdesý barysynda depýtattar tabıǵı jaǵdaıy, iskerlik belsendiligi men týrızm jáne qarjy tehnologıalaryn damytý áleýeti turǵysynan Almatynyń Lýgano qalasyna uqsastyǵyn atap ótti.
Kezdesý qorytyndysynda taraptar Almaty men Shveısarıa qalalary arasyndaǵy yntymaqtastyqty odan ári nyǵaıtýǵa, sonyń ishinde qalalyq ınfraqurylym, ornyqty damý jáne ınovasıa salalarynda tájirıbe almasýǵa múddelilik bildirdi.