Almaty Óńirlik komýnıkasıalar qyzmetiniń onlaın-brıfınginde qalalyq sanıtarlyq-epıdemıologıalyq baqylaý departamenti basshysynyń orynbasary Ásel Qalyqova megapolıstegi epıdemıologıalyq ahýal táýligine 1900-2300 jaǵdaı deńgeıinde turaqtalǵanyn aıtty, dep habarlaıdy Almaty-akshamy.kz.
Spıker KVI dertiniń aldyńǵy aptadaǵy 13 508 jaǵdaıdan ótken aptada 14 213 jaǵdaıǵa deıin óskenin atap ótti. Basqasha aıtqanda, KVI indetiniń besinshi tolqyny ótken aptada ósýin jalǵastyrdy.
«Biraq 27 qańtardan bastap turaqtaný úrdisi tirkeldi. Jalpy, Almaty turǵyndaryna jaýapkershilik tanytqany úshin alǵys aıtqym keledi, óıtkeni bir apta ishinde qaıta vaksınalanǵandardyń sany 42 myń adamǵa nemese 36%-ǵa artty. Bul halyq arasynda ımýndyq aralyqty 56,8%-ǵa deıin arttyrýǵa múmkindik berdi (vaksınalanǵandardyń 52,6%-y + pandemıa bastalǵannan beri aýyrǵandardyń 4,2%-y), bul derttiń turaqtanýyna áser etti. Osy qarqyndy jalǵastyra otyryp, biz tezirek «qyzyl» aımaqtan shyǵyp, burynǵy ómir aǵysyna orala alamyz», - dedi Á. Qalyqova.
Onyń aıtýynsha, qańtar aıynda derttiń ósýi aldyńǵy aptadan beri 40%, al jyl basynan bastap 18 ese ósti.
Onyń ústine, 20-39 jas aralyǵyndaǵy naýqastar sany birshama tómendedi - 40%-dan 35%-ǵa deıin. Osylardan soń 40-59 jastaǵy (26%), 60 jastan asqan (22%) adamdar jıi aýyrady.
«Ótken aptada 14 jasqa deıingi balalar arasynda juqtyrýdyń aıtarlyqtaı ósýi tirkeldi - 5,4%-ǵa (1 463-ten 1 920-ǵa deıin) jáne jasóspirimder – 1%-ǵa (388-den 589-ǵa deıin), sondaı-aq 60 jastan asqan adamdar-3%-ǵa (2 530-dan 3 262-ge deıin). Bir jasqa deıingi balalar arasynda, kerisinshe, 450-den 438 jaǵdaıǵa deıin, sál tómendegeni baıqalady, biraq olardyń úlesi barlyq balalar arasynda aıtarlyqtaı – 22,8%», - dep atap ótti spıker.