Birge atqarylǵan jumys úshin almatylyqtarǵa alǵys aıtty.
Almatynyń burynǵy ákimi Baqytjan Saǵyntaev áleýmettik jeliler arqyly qala turǵyndaryna óz úndeýin joldady, dep habarlaıdy Almaty-akshamy.kz.
«Qurmetti almatylyqtar!
Búgin men óz laýazymymdy jańa ákimge tapsyramyn. Osydan týra 720 kún buryn Prezıdent maǵan Almaty ákimdigin basqarýdy senip tapsyrdy. Bul úshin Memleket basshysyna rızamyn.
Men sizdermen únemi birge boldym. Qala ómirin jaqsartýǵa bar kúsh-jigerimdi arnadym.
Uzaq merzimdi «Almaty-2050» strategıasyn qabyldap, qalany damytýdyń keleshegin aıqyndadyq. Prezıdenttiń «Shetsiz qala» qaǵıdaty negizinde qalaǵa qosylǵan aýdandardyń túıtkildi máselelerin sheshýge basa nazar aýdaryp, «Jańa Almaty» keshendi baǵdarlamasyn qabyldadyq.
Biz áleýmettik máselelerdi sheshý úshin Almatyny aglomerasıa retinde damytý jáne oblystyń qalamen shektesetin 4 aýdanynda jumys oryndaryn qurý jumysyn kún tártibine qoıdyq.
Densaýlyq saqtaý júıesi nyǵaıtyldy. Bir jyldyń ishinde eń zamanaýı jabdyqtarmen jabdyqtalǵan 3 juqpaly aýrýlar aýrýhanasyn iske qostyq. Pandemıa kezinde densaýlyq saqtaý júıesindegi daǵdarysqa jol berilmedi.
Mektepterdi jedel salý baǵdarlamasyn qolǵa aldyq. Tek 2021 jyly 33 jańa mektep salyndy. Bul mektepterdegi oryn tapshylyǵyn azaıtýǵa baǵyttalǵan túbegeıli qadam boldy.
Ekologıany jaqsartý úshin júıeli eki sheshim qabyldandy: mıllıon aǵash otyrǵyzý jáne ekinshi JEO-ny gazǵa aýystyrý.
Meniń árbir jumys kúnim sizderdiń kóz aldyńyzda ótti. Ózderińizben árdaıym kezdesip, aqyldasyp otyrdyq. Apta saıyn Akimat Live tikeleı efırine shyqtym. Atqarylǵan sharalar týraly únemi habardar boldyńyzdar. Birge atqarylǵan jumys úshin almatylyqtarǵa alǵys aıtamyn!
Qalamyzǵa jáne barsha almatylyqtarǵa baqytty ǵumyr tileımin! Almaty máńgi meniń júregimde», - dep jazdy Baqytjan Saǵyntaev.