Profılaktıkany qajet etedi.
Almatyda balalar arasyndaǵy búırek aýrýy órship tur. Bul týraly №2 qalalyq balalar klınıkalyq aýrýhanasy nefrologıa bólimshesiniń meńgerýshisi Sáýle Alpysbaeva brıfıń barysynda málim etti, dep habarlady Almaty-akshamy.kz.
«Búgingi tańda búırek aýrýy óte ózekti. Zár shyǵarý joldarynyń ınfeksıasy buryn ekinshi orynda bolsa, qazir respıratorlyq aýrýlardan asyp túsip, birinshi orynǵa shyqty. Búgingi kúni kóptegen ata-ana balalarynyń búırek patologıasy men zár shyǵarý joldarynyń ınfeksıasyn emdeý úshin dárigerlerge júginip jatyr. Eń aldymen, balalarǵa kóp sý ishý kerek, balalardyń kishi dáretin qýyqta uzaq saqtamaýyn qadaǵalaý qajet. Sonymen qatar ish qatýdyń aldyn alý kerek», - deıdi dáriger.
Onyń aıtýynsha, búırek aýrýlary jáne leıkosıtýrıa, gematýrıa túrindegi zár shyǵarý sındromy kezinde jalpy zár analızin tapsyryp, búırekke últradybystyq zertteý júrgizip, mamanǵa júginý qajet.
Sonymen qatar spıker uldar men qyzdar arasyndaǵy búırek aýrýlarynyń 80 paıyzy mıkrobtyq qabyný aýrýlaryna baılanysty ekenin atap ótti.
«Zár shyǵarý joldarynyń ınfeksıasyn nefrologtar ǵana emes, sonymen qatar jergilikti dárigerler de teksere alady. Bul ınfeksıany emdeý dereý bakterıaǵa qarsy jáne demeýshi terapıany, sondaı-aq profılaktıkany qajet etedi. Zár shyǵarý joldarynyń ınfeksıasy birinshi kezekte qyzdarda kezdesedi», - dedi ol.