Almaty akademıasynyń úzdik túlekteri Prezıdent qolynan pogon aldy.
Bıyl Qazaqstan polısıasynyń qurylǵanyna 30 jyl toldy. Osy jyldar ishinde İİM M.Esbolatov atyndaǵy Almaty akademıasy egemendi elimizdiń ishki ister organdary úshin bilikti de bilimdi mamandar daıarlaýda zor jetistikter men jańashyldyqqa qol jetkizdi, dep habarlaıdy Almaty-akshamy.kz Polisia.kz-ke silteme jasap.
Joǵary tehnologıa ǵasyrynda İİM-niń tarıhy baı oqý oryndarynyń biregeıi M.Esbolatov atyndaǵy Almaty akademıasy qylmystyń aldyn alý jáne ashý salasynda zamanaýı eń jańa jáne progresıvti tehnologıalardy qoldana alatyn mamandar daıarlaýda. Memleket basshysynyń tapsyrmasyna sáıkes, akademıada oqytýdyń jańa formaty aıasyndaǵy ınternet alaıaqtyqqa jáne kıber qylmysqa qarsy kúres jónindegi arnaıy baǵdarlama qabyldandy.
Sońǵy jyldary ınternet alaıaqtyq pen kıber qylmystyń qarqyndy sıpat alyp bara jatqany jasyryn emes. Búkil dúnıe júzin alańdatyp otyrǵan mundaı qylmystarǵa tek bilikti mamandar ǵana tosqaýyl qoıa alady. Osy maqsatta akademıada kıberqylmystarmen kúresetin joǵary sapaly mamandardy daıarlaý júıeli jolǵa qoıylǵan.
Qazaqstan Respýblıkasynyń Prezıdenti, Qazaqstan Qarýly kúshteriniń Joǵary Bas qolbasshysy Qasym- Jomart Toqaev arnaıy jáne áskerı joǵary oqý oryndaryn úzdik bitirýshilerge óz qolymen ofıserlik shenderin tabys etti. Olardyń arasynda Almaty akademıasyn “Aqparattyq júıe” baǵdarlamasy jáne Prezıdent tapsyrmasyna sáıkes júzege asyrylǵan oqytýdyń jańa formaty aıasyndaǵy ınternet alaıaqtyqqa jáne kıber qylmysqa qarsy kúres jónindegi arnaıy baǵdarlama boıynsha bilim alǵan Nurjan Bazbaev ta bar.
Sondaı-aq “Quqyq qorǵaý qyzmeti” baǵdarlamasy boıynsha akademıany úzdik bitirgen Ámına Taspaeva Qazaqstan Respýblıkasynyń İshki ister mınıstri Marat Ahmetjanovtyń qolynan “polısıa leıtenanty” shenin aldy. Akademıa túlekteriniń mundaı jetistikteri oqý ornynyń ujymy úshin zor maqtanysh. Taǵy bir aıta ketetin jáıt, Almaty akademıasy QR Bilim jáne ǵylym mınıstrligi attestasıalyq komısıasy tarapynan ishki ister organdary úshin sapaly kadrlar daıarlaýdaǵy jetistikteri úshin joǵary baǵa aldy.