Almatyda balalar anestezıologıasy men qarqyndy terapıa salasyndaǵy ózekti máseleler talqylandy.
25-28 qyrkúıek aralyǵynda Almatyda gıbrıdti formatta Qazaqstan balalar anestezıologtary men reanımatologtarynyń respýblıkalyq ǵylymı-praktıkalyq konferensıasy ótti, dep habarlaıdy aqshamnews.kz «Pedıatrıa jáne balalar hırýrgıasy ǵylymı ortalyǵy» baspasóz qyzmetine silteme jasap.
Konferensıaǵa Reseı, Ózbekstan, Qyrǵyzstan, Túrkıa, Lıtva elderinen kelgen bilikti mamandar, medısınalyq joǵary oqý oryndarynyń rektorlary men profesorlary, ǵylymı ınstıtýttardyń jetekshi mamandary men basshylary, sondaı-aq elimizdiń jáne shet elderdiń balalar anestezıologtary men reanımatologtary qatysty. Barlyǵy 500-den astam maman qatysty.
Konferensıanyń saltanatty ashylýy Qazaqstan Respýblıkasynyń Densaýlyq saqtaý mınıstri Aqmaral Álnazarovanyń, «Anestezıologtar jáne reanımatologtar federasıasy» RQB prezıdenti, profesor Erǵalı Mıerbekovtyń, Pedıatrıa jáne balalar hırýrgıasy ǵylymı ortalyǵynyń Basqarma tóraǵasynyń orynbasary Lázat Manjýovanyń jáne shetelden kelgen qonaqtardyń quttyqtaý sózimen bastaldy.
«Balalar densaýlyǵyn qorǵaý – memlekettiń basty basymdyqtarynyń biri. Sońǵy úsh jylda balalar ólim-jitimi azaıdy, jáne bul turaqty tendensıa jalǵasýda. Bul jetistikter júıeli jumystardyń nátıjesi. Balalar anestezıologıasy men reanımatologıa qyzmeti nazarymyzda, bul sala mamandarynyń orny erekshe. Jyldan-jylǵa materıaldyq-tehnıkalyq baza jaqsaryp, kadrlyq áleýet artýda, jas mamandardy daıarlaý qolǵa alynýda, jańa kafedralar ashylýda», - degen Densaýlyq saqtaý mınıstri Aqmaral Álnazarovanyń quttyqtaýynda
«Anestezıologtar jáne reanımatologtar federasıasy» RQB prezıdenti, profesor Erǵalı Mıerbekov:
«Konferensıa – balalar anestezıologıasy men qarqyndy terapıa salasyndaǵy jetekshi mamandardyń tájirıbe almasyp, bilimderin jetildirý múmkindigin beretin alań. Bul shara elimizdiń medısınalyq salasyn damytýǵa jáne halyqaralyq baılanystardy kúsheıtýge baǵyttalǵan mańyzdy oqıǵa bolyp tabylady».
Konferensıa barysynda elimizdegi balalar anestezıologıasy men reanımatologıa qyzmetiniń qazirgi jaǵdaıy, balalarǵa anestezıologıalyq kómek pen qarqyndy emdeýdi jetildirý, balalar anestezıologıasyndaǵy neıromonıtorıng jáne neıronavıgasıa máseleleri talqylandy. Sondaı-aq, pedıatrıa jáne neonatologıadaǵy anestezıolog-reanımatologtardyń jumysyndaǵy ózekti máseleler qarastyryldy.
Alqaly jıynda anestezıologıa salasyna kóp jyl eńbek sińirgen ardager balalar anestezıologtary men reanımatologtaryna qurmet kórsetildi. Olarǵa «Ardager anestezıolog-reanımatolog» jáne «Úzdik anestezıolog-reanımatolog» tósbelgileri tabystaldy.
Konferensıa aıasynda eki ǵylymı ortalyqta sheteldik mamandardyń dáristeri jáne tórt sheberlik synyby ótkizildi. Túrkıa jáne Reseı mamandary 100-den asa jas mamandardy oqytty.
İs-sharanyń basty maqsaty – Qazaqstan halqyna mamandandyrylǵan medısınalyq kómekti jaqsartý úshin anestezıologtar men reanımatologtardy jáne sabaqtas mamandyqtardy biriktirý, jınaqtalǵan máselelerdi talqylap, sheshý joldaryn izdeý.
Konferensıa QR Densaýlyq saqtaý mınıstrliginiń qoldaýymen «Anestezıologtar jáne reanımatologtar federasıasy» Respýblıkalyq qoǵamdyq birlestigi jáne Pedıatrıa jáne balalar hırýrgıasy ǵylymı ortalyǵynyń uıymdastyrýymen ótti. Shara barysynda anestezıologıa men qarqyndy emde qoldanylatyn medısınalyq qural-jabdyqtar men dári-dármekterdiń kórmesi uıymdastyryldy.