«Almaty» ÁKK» AQ enshiles uıymy «Almaty Finance» JSHS Almatyda Qazaqstandaǵy alǵashqy «Baby Carrots» sortty shaǵyn sábiz shyǵaratyn sehtyń ashylýyn qarjylandyrdy, dep habarlaıdy aqshamnews.kz
Qaryz alýshy «Eco Sunny Green» JSHS-ge bólingen 124 mıllıon teńgeniń 99 mıllıony qural-jabdyq satyp alýǵa jáne óndiris oryndaryn jóndeýge baǵyttalsa, qalǵan 25 mıllıony aınalym qarajatyn tolyqtyrýǵa jumsalady.
Joba «Almaty Business-2025» óńirlik kásipkerlikti damytý baǵdarlamasy aıasynda qarjylandyryldy. Nesıe lımıtiniń syıaqy mólsherlemesi jyldyq 6% quraıdy. Qarjylandyrý merzimi jabdyq satyp alý jáne úı-jaılardy jóndeýge – 7 jyl, al aınalym qarajatyn tolyqtyrý úshin – 3 jyl.
Shaǵyn sábiz óndirýge arnalǵan shıkizat Almaty jáne Jambyl oblystarynyń, sondaı-aq Ózbekstan men Qyrǵyzstannyń sharýalarynan satyp alynbaq. Seh jylyna 3 myń tonna daıyn ónim shyǵarýdy josparlap otyr, bul 50% qýattylyqpen jumys istegen kezdegi kórsetkish. Ónim jýylǵan, týralǵan jáne oralǵan kúıde 230 jáne 380 gramdyq paketterde satylady.
Qazirgi ýaqytta «Eko Sanı Grın» JSHS gıpermarketter men Almaty qalasyndaǵy jekemenshik mekteptermen daıyn ónimdi satyp alý boıynsha kelisimder jasasqan.
«Seh Bostandyq aýdanynda ornalasady. Jergilikti óndiristi iske qosý ımporttyq shaǵyn sábiz analogtaryn almastyryp, tutynýshylarǵa arzan baǵamen usynýǵa múmkindik beredi. Sonymen qatar, 15 jańa jumys orny ashylady jáne jergilikti búdjetke túsetin salyq kólemi artady», – dedi «Almaty Finance» JSHS Basqarma Tóraǵasynyń orynbasary Juldyz Igenov.
Anyqtama úshin:
«Baby Carrots» – AQSH pen Eýropada tanymal sábiz óndirisiniń túri. Bul ónimniń ereksheligi – kókónis qabyǵy arshylyp, jýylyp, maıdalap týralyp, tutynýǵa daıyn kúıde satylady. Ónim balalar men eresekter arasynda joǵary suranysqa ıe.