Kóptegen ata-analar jyl saıyn mektep oqýlyqtaryna saı keletin qap taba almaı qıyndyqtarǵa tap bolady.
Ár oqý jyly bastalǵanda ata-analar jańa qaptar satyp alýǵa májbúr. Alaıda qaptardyń ólshemi kóbine kitaptarǵa sáıkes kelmeıdi. Árıne, bul otbasylyq búdjetke aıtarlyqtaı áser etedi, dep habarlaıdy aqshamnews.kz.
Osyǵan qatysty depýtat, burynǵy Bilim berý mınıstri Asqat Aımaǵambetov qozǵady.
Aımaǵambetovtyń sózine sensek, 2020 jyly oqýlyqtardyń formattaryn birizdendirý týraly sheshim qabyldanǵan.
«2020 jyldan keıin shyǵarylatyn oqýlyqtar biryńǵaı formatta daıyndalady, bul oqýlyqtardy yńǵaıly ári standartqa saı etedi», – dep túsindirdi depýtat.
Degenmen, 2020 jylǵa deıin basylyp shyqqan oqýlyqtar áli de mektepterde qoldanysta. Kóptegen eski oqýlyqtar mektep kitaphanalarynan áli de alynyp tastalǵan joq.
«Áli jaramdy oqýlyqtardy paıdalana beremiz, olardy laqtyryp tastamaımyz», – dep atap ótti Aımaǵambetov.
Depýtattyń sózinshe, oqýlyqtardyń ortasha paıdalaný merzimi shamamen bes jyldy quraıdy.
«Bilim mınıstrligi jańa oqý baǵdarlamalaryn bekitkennen keıin, oqýlyqtar jańa formatqa kezeń-kezeńimen aýystyrylatyn boldy. Mektepter synyptan synypqa kóshken saıyn oqýlyqtar da jańartylady», – dedi depýtat.
Bul jańa sheshim oqýlyqtar qaptaryna qatysty máselelerdi, sondaı-aq basqa da qıyndyqtardy sheshýge kómektesedi. Aımaǵambetov jańa standarttarǵa sáıkes keletin oqýlyqtar mektepterge birtindep engiziletinin jetkizdi.
«Aldaǵy eki jyl ishinde jańa oqýlyqtar daıyn bolady dep oılaımyn. Mınıstrlik osy baǵytta jumystaryn jalǵastyryp jatyr», – dep túıindedi Asqat Aımaǵambetov.