Sonyń saldarynan 3 adam qaza taýyp, 55 adam jaraqat alǵan.
Almatyda jyl basynan beri avtobýs júrgizýshileriniń kinásinen 170 JKO oryn aldy, dep habarlaıdy Polisia.kz
«Qaýipsiz jol» jedel aldyn alý is-sharasy aıasynda jolaýshylar tasymalymen aınalysatyn avtokólik kásiporyndaryna, qalanyń jol jaǵdaıynda avtobýstardyń tehnıkalyq jaǵdaıyna, durys jumys isteýine muqıat tekserý uıymdastyryldy.
«Osylaısha, biz kólik quralynda jolaýshylar men júkti tasymaldaıtyn júrgizýshilerdiń kóliktik jáne eńbek tártibin jaqsartý, tehnıkalyq aqaýy bar nemese qaıta jabdyqtalǵan jolaýshylar kóligin paıdalaný derekteriniń aldyn alý, sondaı-aq zańsyz jolaýshylar tasymalynyń jolyn kesý maqsatyn kózdep otyrmyz. Bul jumysqa múddeli memlekettik organdardyń da, azamattyq alánstyń ókilderi de barynsha jumyldyrylǵan», – dedi Almaty qalalyq PD Ákimshilik polısıa basqarmasy bastyǵynyń orynbasary Bolatbek Baıatanov.
Polıseıler qabyldanǵan sharalarǵa qaramastan, qoǵamdyq kólik júrgizýshileri jol qozǵalysy erejelerin óreskel buzyp, jol-kólik oqıǵalaryna jol berip jatqanyn atap ótti. Tek jyl basynan beri avtobýs júrgizýshileriniń kinásinen 170 jol-kólik oqıǵasy oryn alyp, sonyń saldarynan 3 adam qaza taýyp, 55 adam jaraqat alǵan. Sonymen qatar, qoǵamdyq kólikte jolaýshylardyń qulaýy óte jıi kezdesedi, ol negizinen shuǵyl tejeý nemese kerisinshe, kúrt qozǵalý saldarynan oryn alady. 2021 jyly avtobýstyń ishinde qulaǵannan 328 jolaýshy zardap shekti. Sondaı-aq, 2022 jyldyń basynan beri PD-nyń aldyńǵy sheptegi bólimsheleriniń qyzmetkerleri qoǵamdyq kólik júrgizýshileriniń 286 jol erejesin buzý deregin anyqtady.
«Almaty qalasynda 21 avtokásiporyn jumys isteıdi, olardyń balansynda 147 baǵyt boıynsha jolaýshylar tasymalymen aınalysatyn 2200-den astam avtobýs pen 160 troleıbýs bar. Qoǵamdyq kólikterdiń qatysýymen oryn alǵan jol-kólik oqıǵalarynyń jaǵdaıy áli de alańdatady. Keıbir avtobýs júrgizýshileriniń kólik tártibi óte tómen deńgeıde qalyp otyr. Avtoparkterdiń basshylyǵy júrgizýshilerge baqylaý júrgizbeıdi, júrgizýshi kýáliginiń bar-joǵyn, sondaı-aq jelige shyǵar aldynda tehnıkalyq jaǵdaıyn teksermeıdi. Olar ekologıalyq jáne tehnıkalyq talaptarǵa saı kelmeıtin avtobýstardy jelige shyǵarýdy jalǵastyrýda», – deıdi B. Baıatanov.
Qazirgi ýaqytta Almaty joldarynda patrúldik polısıa jasaqtarynyń tyǵyzdyǵy artty. Profılaktıkalyq jáne reıdtik is-sharalar jalǵasýda