Almaty qalasynyń máslıhatynda komýnaldyq ınfraqurylym, turǵyn úı ınspeksıasy, energetıka, sýmen jabdyqtaý jáne qalalyq mobıldilik jónindegi turaqty komısıanyń otyrysy ótti. Onda QR zańnamasyndaǵy aýyr júk avtokólikteriniń talaptardy saqtaý máselesi qaraldy, - dep habarlaıdy Aqshamnews.kz.
Otyrysta jol qozǵalysyn uıymdastyrý jáne jolaýshylar kóligi basqarmasynyń ókilderi qala boıynsha júk kólikteriniń qozǵalysyn retteý boıynsha qabyldanyp jatqan sharalar men usynystar týraly baıandady. Málimetterge sáıkes, ruqsat etilgen massasy 3,5 tonnadan asatyn kólikterdiń qozǵalysyn shekteý kólik quraldarynan shyǵatyn zıandy zattardyń jalpy kólemin 6%-ǵa, al keıbir qaýipti komponentter boıynsha 30%-ǵa deıin azaıtýǵa múmkindik beredi. Osyndaı tájirıbe Máskeý, Sankt-Peterbýrg, Kazan, London, Býdapesht jáne Beıjiń qalalarynda sátti iske asyrylyp keledi.
Profıldik komısıanyń tóraǵasy, máslıhat depýtaty Sadır Hamraev joldardaǵy shamadan tys júkteme máselesi burynnan bar ekenin jáne ony júıeli sheshý qajettigin atap ótti. Onyń aıtýynsha, qalanyń qaýipsizdigi men joldardyń saqtalýy basty basymdyq, alaıda júkteme normalary jıi buzylady, sonyń saldarynan jol jabyny merziminen buryn tozady.
«Búgin biz jumys tobyn quryp, jol polısıasy, kólik baqylaý jáne jol qozǵalysyn uıymdastyrý basqarmasymen birlesken jumysty kúsheıtý týraly sheshim qabyldadyq. BAQ ókilderiniń qatysýymen reıdter uıymdastyrylyp, zań talaptaryn buzatyn júrgizýshiler men kompanıalar anyqtalady», – dedi depýtat.
Sondaı-aq ol Almatyda júk kólikteriniń salmaǵyn ólsheıtin tek bir ǵana jyljymaly stansıa jumys isteıtinin aıtyp, kólik baqylaý organdaryn zamanaýı ólsheý quraldarymen qosymsha jabdyqtaý qajet ekenin jetkizdi.
Máslıhat depýtaty Rýslan Idrısov qala joldarynyń tehnıkalyq normalaryn saqtaý mańyzdylyǵyn atap ótti.
«Qaladaǵy asfált jabyndysy bir oske 8 tonna júktemege eseptelgen. Biz osy normany saqtaýymyz kerek. Keıbir júk kólikteri normadan artyq, 18 tonnaǵa deıin tasymaldaıdy, bul joldyń tez buzylýyna ákeledi. Sondyqtan joldarǵa arnaıy salmaq ólsheıtin dachıkter ornatyp, júktemeni avtomatty túrde baqylaý qajet»,-dedi R.Idrısov.
Almaty qalasynyń polısıa departamenti bastyǵynyń orynbasary Erjan Uzabaev qazirgi ýaqytta aýyr júk kólikteriniń qozǵalysyna shekteý tek úsh magıstralda, Ál-Farabı, Dostyq jáne Nazarbaev dańǵyldarynda bar ekenin habarlady. Ol zańnamaǵa ózgerister engizip, mundaı aımaqtardy keńeıtý qajettigin atap ótti.
Otyrys qorytyndysy boıynsha jol qozǵalysyn uıymdastyrý basqarmasy, kólik baqylaý jáne polısıa arasynda ózara is-qımyldy úılestiretin jumys toby qurylatyn boldy. Sonymen qatar depýtattar joldardyń júktemesin ólsheýge arnalǵan qosymsha quraldarmen jabdyqtaý jáne Almaty qalasynda júk kólikteriniń qozǵalysyn ońtaılandyrý tujyrymdamasyn ázirleý bastamasyn kóterdi.
Budan bylaı zań talaptarynyń saqtalýyn baqylaý jáne shamadan tys júktemeniń aldyn alý máseleleri turaqty túrde vedomstvoaralyq ózara jumystyń bir bóligine aınalady.