Búginde Memleket basshysynyń tapsyrmasyna sáıkes, elimizdiń 20 óńirinde Psıhologıalyq qoldaý kórsetý ortalyqtary jumys jasaýda.
Bul ortalyqtar mektep psıhologtaryna ádistemelik qoldaý kórsetedi jáne oqýshylar men olardyń ata-analaryna keńes berýmen aınalysady, - dep habarlaıdy Aqshamnews.kz Oqý-aǵartý mınıstrligine silteme jasap.
Bıylǵy jyldyń basynan ortalyqtar 13 myńnan astam balaǵa jáne shamamen 10 myń ata-anaǵa psıhologıalyq jáne konsýltasıalyq kómek usyndy.
Elimizdiń bilim berý uıymdarynda 9 myńnan astam maman oqýshylar men olardyń ata-analaryna psıhologıalyq-pedagogıkalyq qoldaý kórsetýde. Jyl saıyn olardyń kómegin ondaǵan myń bala anyq sezinedi.
Mınıstrlik pedagog-psıhologtardyń shtat sanyn arttyrý, bilim berý uıymdaryndaǵy psıhologıalyq qyzmettiń normatıvtik-quqyqtyq bazasyn jetildirý boıynsha birqatar sharalardy júzege asyrýda.
«Memleket mektepterdegi psıhologıalyq qyzmetti kúsheıtýge erekshe mán beredi. Pedagog-psıhologtardyń sanyn arttyrý, mamandarǵa kásibı jáne ádistemelik qoldaý kórsetý boıynsha júıeli jumystar júrgizilýde, psıhologıalyq qyzmet týraly zań jobasyn ázirleý qarastyrylýda. Bul sharalardyń barlyǵy balalarǵa kórsetiletin psıhologıalyq kómektiń sapasyn arttyrýǵa baǵyttalǵan», — deıdi Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.
Esterińizge sala keteıik, Memleket basshysynyń Ulttyq quryltaıdyń IV otyrysynda bergen tapsyrmasyna sáıkes, Qazaqstan Respýblıkasynyń Májilis depýtattary «Psıhologıalyq qyzmet týraly» Zań jobasyn ázirlep, engizgen bolatyn. Qujat psıhologıalyq kómek kórsetý ınstıtýtyn júıeli damytýǵa baǵyttalǵan jáne qazirgi ýaqytta memlekettik organdarda kelisý kezeńinen ótýde.