Jalpy eldegi kólikterdiń 60 paıyzy eski.
Shahardyń eko-beketterinde bir jyl ishinde 223 myńnan asa mashına toqtatylsa, onyń 34 myńynan shamadan tys ýly gaz bólinetini anyqtalǵan. Endi bıyldan bastap tútindegen kólikterdi «Ekosergek» beınekameralary anyqtap, polısıaǵa tizimin berip otyrady, dep habarlaıdy Almaty-akshamy.kz.
«Bul kameralar kóshedegi barlyq kólikterdi túsiredi. Shamadan tys tútindegen tehnıkalardy birden anyqtalyp, ortalyq júıege túsedi. Ary qaraı tártip saqshylary aınalysady», - deıdi joba menedjeri Andreı Lıtvınov.
Ekologtar qaladaǵy aýanyń lastanýyna basty sebep – osy kólikterden shyǵatyn zıandy zattar ekenin aıtady. Qazir temir tulparlardyń ekologıaǵa áseri 70%-ǵa jetken. Sondyqtan ár júrgizýshi bul máselege jaýapkershilikpen qaraǵanda ǵana oń sheshimin tabady dep otyr.
«Ekologıanyń jaqsarýy tek mundaı ákimshilik sharalarǵa ǵana emes, halyqtyń ózine tikeleı baılanysty. Halyqtyń ekologıalyq mádenıetiniń tómendigi bizdiń ekologıalyq ahýalymyzdy jaqsartýǵa kedergi keltirip otyrǵan faktor», - deıdi ekolog Dinmuhamed Lesbekov.
Mamandardyń sózinshe, elimiz boıynsha qoldanystaǵy kólikterdiń 60%-y 20 jyldan asqan. Qazir ekologıalyq baqylaý salasyndaǵy zańdarǵa engizý men túzetýler engizý májiliste qaralyp jatyr. Máselen, buǵan deıin aýany lastaýshy kólikterdiń júrgizýshilerine alǵashqyda eskertý berilse, endi bul tártip alynyp tastalýy múmkin.
Qala ákimdigi ekologıany jaqsartý máselesi ózekti ekenin jaqsy biledi. Qazir qaladaǵy qoǵamdyq kólikter gazǵa aýystyrylyp jatyr. Al eski temir tulparlardyń problemasy áli kún tártibinde tur. Megapolıste ótken jyldyń ózinde aýany lastaǵan kólik ıelerine 207 mln teńgeden asa aıyppul salynǵan.