Medıabilim berý jaǵdaıyndaǵy jýrnalısıka jáne PR
Osyndaı ataýmen Bóketov ýnıversıtetiniń fılologıa fakúltetinde jýrnalısıka kafedrasynyń 30 jyldyǵyna arnalǵan forým ótti. Saltanatty jıyn kafedrada qyzmet etken ustazdardyń, túlep ushqan túlekterdiń basyn qosty, dep habarlaıdy Almaty-akshamy.kz.
Forýmǵa «Alatau - Aqparat» medıaholdınginiń bas dırektory Erjan Qalymbaıuly qatysyp, óz usynysyn aıtty. Budan bylaı «Jýrnalısıka» jáne «Qoǵammen baılanys» stýdentteri «Almaty Aqshamý», «Vechernıı Almaty» basylymdary men medıaholdıng saıtynan óndiristik is-tájirıbeden óte alady. Endi E.A.Bóketov ýnıversıteti men «Alatau - Aqparat» medıaholdıngi ekijaqty memorandým aıasynda birlesip jumys jasaı alady.
Óz sózinde Erjan Qalymbaıuly: «Qazirgi ýaqytta jýrnalıser ulttyq jýrnalısıkaǵa, aqparattyq saıasattyń qalyptasýyna, memlekettik sananyń ornyǵýyna ózderiniń qalam qarymymen tabysty eńbek etedi. Áriptesterimiz Qazaqstanda ǵana emes, shet memlekette de jemisti qyzmet etýde. Jýrnalısıka salasynda ǵana emes, memlekettik qyzmette, buqaramen baılanys, úkimetpen baılanys salasynda da eńbek etip júrgen áriptesterimiz jeterlik. Biz árqashan Bóketov ýnıversıteti jýrnalısıka kafedrasynyń túlegi ekenimizdi asa maqtanyshpen aıtyp júremiz. Aldaǵy ýaqytta da osy qarashańyraqta óz isiniń has sheberi atanatyn, bilimdi de bilikti mamandar shyǵatynyna senimimiz mol», — dedi.
İs-sharanyń basynda forým qatysýshylary jýrnalısıka kafedrasynyń tarıhy jaıly qysqametrajdy fılmdi tamashalady. Jıynda qalamy qarymdy jýrnalıs, Qazaqstannyń eńbek sińirgen qaıratkeri, Qazaqstan joǵary mektebiniń akademıgi Zarqyn Taıshybaı «Osydan 30 jyl buryn Qazaq ulttyq ýnıversıtetinen keıin Qaraǵandy Bóketov ýnıversıteti jýrnalısıka mamandyǵyn ashý baqytyna ıe boldy. Aqparat maıdanynda ıyqtasa qatar shaıqasyp júrgen jýrnalıserge tek sáttilik tileımin. Táýelsizdikti tý etip, qajyrly eńbek etińder. Jazarlaryń kóp, sózderiń ótimdi, eńbekteriń jemisti bolsyn!» deı kele, sonaý 1993 jyly ózi negizin qalaǵan jýrnalısıka kafedrasynyń tarıhyna keńinen toqtaldy.
Kafedrada ustazdyq qyzmet etken ardager ustazdar, buqaralyq aqparat quraldarynyń tizginin ustaǵan ózge túlekter de ýnıversıtet qabyrǵasynda ótken jyldardyń esten ketpes ystyq estelikterimen bólisti. Jas urpaqqa jýrnalısıkanyń qyr-syryn úıretken Qýandyq Shamahaı, Maǵaýıa Sembaı, Kárim Saýǵabaev, Martbek Toqmyrza syndy taý tulǵalardy saǵynyshpen eske aldy.
Jýrnalısıka kafedrasy otyz jyldyń ishinde eki myńǵa jýyq túlekti qanattandyrdy. Qazirgi tańda jýrnalısıka jáne qoǵammen baılanys mamandyqtarynda oqıtyn bilim alýshylarǵa eki profesor, eki qaýymdastyrylǵan profesor, 1 PhD doktor, tájirıbeli aǵa-oqytýshylar men buqaralyq aqparat quraldary salasynyń mamandary dáris beredi. Mamandardyń teorıalyq bilimimen qatar praktıkalyq biliktiligi de joǵary. Stýdentterdiń shyǵarmashylyǵyn shyńdaýyna barlyq jaǵdaı jasalǵan. Oqý televızıasy men Buketov radıosynda, Bóketov ýnıversıtetiniń baspasóz qyzmetinde, «Jastar álemi» jýrnalynyń redaksıasynda teorıalyq bilimdi praktıkamen ushtastyrady. Túlekter jetekshi buqaralyq aqparat quraldarynda, baspasóz qyzmetterinde, aqparattyq jáne jarnamalyq agenttikterde jemisti qyzmet etýde.
İs-sharanyń alǵashqy resmı bólimi aıaqtalǵannan keıin forýmǵa qatysýshylar úsh seksıaǵa bólindi. Belgili jýrnalıser men PR-mamandar jýrnalısıka teorıasy men praktıkasyna, medıabilim berýge, medıaetıkaǵa jáne medıakommýnıkasıanyń basqa da aspektilerine qatysty ózekti taqyryptar boıynsha baıandama jasady.